Babaas bly op koers, behou aanspraak
Ná die nederlaag teen Harlequins van Oudtshoorn in die vorige ronde van die Super Liga in die Suidwestelike Distrikte (SWD) se klubrugby-liga, het Barbarians van Mosselbaai die afgelope Saterdag op D'Almeida Park goed teruggeslaan deur dié belangrike tuiswedstryd teen Evergreens van Pacaltsdorp met 32-16 te wen. Dit was 'n belangrike oorwinning om die Babaas se 2024-seisoen op koers te hou waar dié span ná vyf wedstryde steeds die eerste posisie op die punteleer beklee.
Die nederlaag teen Quins was 'n wekroep vir die Barbarians en in aanloop tot die kragmeting teen Evergreens is daar hard agter die skerms gewerk om probleem-areas aan te spreek. Dit het tot gevolg gehad dat die Babaas teen die besoekers een van sy meer afgeronde vertonings sover dié seisoen opgedis het. Dit voorspel alles goeie dinge vir die Babaas en met nog ses wedstryde oor voor die eerste ronde van Premier Liga voltooi word, sal dit baie vir die span se selfvertroue beteken.
Teen die swaarder pak voorspelers van die besoekers, was die Barbarians veral in die eerste helfte onder groot druk geplaas in die vaste fasette. Die Barbarians het egter geleidelik hul ritme gevind en beter vertoon in die vaste fasette en baie goeie teenstand gebied. Die tuisspan se verdediging was ook besonder goed ná dit gelol het teen Harlequins die vorige week en Evergreens is in die eerste helfte nooit toegelaat om die doelgebied te haal vir 'n vyfpunter nie. Dit het die tuisspan in staat gestel om met die draaislag met 10-3 voor te loop en 'n opwindende tweede helfte is in die vooruitsig gestel.
Tweede helfte
Die tweede helfte het teen 'n geweldige pas begin en toe Evergreens met 'n strafdoel en 'n onverdoelde drie met 11-10 die voortou geneem het, was dit voldoende beloning vir kanse wat suksesvol afgerond is. Die Babaas het egter teruggeslaan en korstondig die voortou geneem voor die besoekers met nog 'n onverdoelde vyfpunter die telling tot 16-17 gevoer en die wedstryd fyn gebalanseerd was en kon nog enige kant toe swaai.
Die tuisspan het egter veral in die laaste tien minute met goeie konstruktiewe en aanvallende spel die skaal in sy guns geswaai en met nog twee drieë sy heerskappy ingevryf om uiteindelik welverdiend as die oorwinnaar van die veld te stap.
Ander spanne
Barbarians se B- en C-spanne, wat nog onoorwonne is ná vyf wedstryde, het onderskeidelik met 27-11 en 21-3 gewen. Hierdie naweek het die klub geen wedstrydverpligtinge nie en pak Heidelberg volgende week in ‘n wegwedstryd.