Ubuholi obuvuthiwe bethule ukunikezelana okungenazihibeU
Izinguquko ezaba khona zeluswe kahle kwaba nokudluliselwa kwamandla okunokuthula
KUVAMILE ukuthi nxa kuba noguquku lobuholi kwipolitiki kube nomsindo. Lo msindo kokunye uholela ekubhidlikeni kwezinhlaka zokuphatha. Zimbalwa iziwombe lapho uguquko ekuphatheni luba nokuthula. Ngesikhathi owayenguMengameli wokuqala ngaphansi kwedemokhrasi uMnu uNelson Mandela ebeka phansi izihlangu kwaba nokuthula nenqubekela phambili. Wathi uma ezibeka zithathwa nguMnu uThabo Mbeki kwaba sengathi akwenzekalanga lutho. Lesi senzo satuswa kakhulu njengesitshengisa ukukhula kwepolitiki yakuleli, kanjalo nokukhula kwabaholi abathintekayo. Kubantu baseNingizimu Afrika, laba baholi babeza namakhono angefani futhi behola ngezikhathi ezabe zibafanele.
Kubukeka kube yileso naseNhlokodolobha yaKwaZulu-Natal. Ngesikhathi iqembu elibusayo eMsunduzi limemezela izinguquko ezabe zizoba khona kulo Masipala, kwabakhona ukwesaba kwabanye ngokuthi lokhu okwejwayeleke ukwenzeka kungahle kukhinyabeze ukuhanjiswa kwezinsiza emphakathini wakule ndawo.
Izinguquko lezi zabe zizothinta owabe eyiMeya uMnu uThemba Njilo nesigungu sakhe sonke. Lezi kwabe kuyizinguquko ezinqala, ngokubuka kweqembu elibusayo ezabe zidingeka. Babili abantu ababemqoka kulezi zinguquko nokungathi uma benyathele kabi buchitheke bugayiwe, kwakuyikhansela uNjilo kanye nowayeseqokwe njengeMeya entsha ikhansela uMzimkhulu Thebolla.
Inkulumo kaNjilo yokwamukela isinqumo seqembu nokuzibophezela ekusebenzisaneni nobuholi obusha yahlelembela izinguquko. Ephawula ngesinqumo seqembu uNjilo wacashunwa ethi: “Yize phezu kwezingqinamba ngizame ngawo wonke amandla ukusebenzela umphakathi waseMsunduzi nokuyinto engizoqhubeka nokuyenza ngisho ngingaseyona iMeya,” la magama abe edodile.
Kanjalo nokukhula kukaThebolla okungathanga nxa ethatha wakubona lokho kuwukunqoba, kepha wakwamukela njengesinqumo seqembu sokuqhuba lokho okwabe sekuhlakulwe khona.
Isipiliyoni sakhe ebuholini kusuka njengomholi wentsha, ukuba yilungu
Ulesigungu esiphezulu kuSifunda uMgungundlovu nokuzicija ngezifundo zokuphatha koHulumeni Bendawo kwenza lamlingana khaxa ibheshu lokuhola inhlokodolobha. Ngosuku lokuqala ebekiwe wakhomba umhlahlandlela wathi: “Namhlanje ngelinye ithuba lokulalela abantu bethu bese sibabikela. UHulumeni Wendawo umayelana nokuhlinzeka izinsizakalo, hhayi nokuzibandakanya nepolitiki yamaqembu.”
Kubantu baseMsunduzi waba nesicelo esithi: “Engikucelayo emphakathini waseMsunduzi ukuba sinikwe ithuba lokuveza lokho esingahle sikwenze bese sahlulelwa ngalokho”. La magama aveza isithombe somholi owabe esiqonda isimo athatha ngaphansi kwaso kanti futhi nowabe ezilungele izinselelo.
Umyalelo kulokho okwabe kumele kwenzeke wabe usobala njengoba wabe uqukethwe enkulumweni kaNdunankulu wesifundazwe uMhlonishwa uSihle Zikalala nowathi: “Manje yisikhathi sokuhlomulisa ithemba abantu baseMsunduzi abalibeka kithina.”
Kulezinsuku ezili-100, iMeya uThebolla uwuguduze cishe wonke uMsunduzi ehlangana nezinhlaka ezahlukene ngenhloso yokuvuselela ukwethenjwa kobuholi nokuyinto emqoka ngesikhathi sakhe.