Ibutho loMsunduzi elicijele impi yentuthuko
Ukuqokwa kwamalungu esigungu sokuphatha uMkhandlu uMsunduzi kwahambisana nezinguquko nombono omusha. UBuholi obukhona buzibophezele ngokwamagalelo, ngokwenza ngokwezidingo nangokwethembeka emphakathini wonkana
KWIPOLITIKI kulula ukusho kunokwenza. Lokhu kucaca kuthi bha uma kuqokwa umholi nokuyinto elula, kepha okukhulu okulandelayo yithimba lalabo abazobambisana naloyo oseqokiwe.
Laba kumele kube ngabesilisa nabesifazane abanombono ofanayo nalowo oseqokelwe ukuhola. Ngokuba nombono ofanayo akusho ukuthi akukho lapho behluka khona ngendlela okumele kwenziwe ngayo izinto. Ngesikhathi kumenyezelwa ubuholi obusha ezinsukwini ezili-100 ezedlule amehlo athi njo ekutheni ngobani labo abozozungeza iMeya uMzimkhulu Thobella.
Ethula ubuholi (amagama) obusha uNobhala we-African National Congress (ANC) KwaZulu-Natal, uMnu uMdumiseni Ntuli wathi: “Simemezela ithimba labesilisa nabesimame elinikezwe umsebenzi onqala wokuthuthukisa amadolobha amabili ukuze lihlangabezane nokulindelwe abantu bethu.” Lesi simemezelo sabe silindwe ngabovu hhayi kuphela yizakhamuzi kepha nabamabhizinisi.
Kuthe uma uNtuli esethule eleMeya uThobella, kwase kulandela elesekela nokwaba yikhansela uManilal Inderjit, nowalandelwa yigama likaSomlomo iKhansela u-Eunice KaMajola Zondi. Ikhansela uVusi Ntshangase yena waqokwa njengoSotswebhu .
Echaza abakuphathisiwe njengobuholi obusha uThobella wathi: “Ukugunyazwa esinikwe khona kulula kabi: ukuletha ukukhanya okusha. Abantu baseMsunduzi basinikeze ithuba lokuthi siphindele emuva sihlanganise amakhanda.”
Isekela lakhe lona lathi: “Amagalelo, okwenza okufanele nokwethembeka kuzoba yizinsika ezintathu ezizosekela ukuya koMsunduzi empumelelweni.” Lobu buholi obusha bungena nje imilomo ibivunana emphakathini ukuthi uMsunduzi ongagcini nje ngokuba yiNhlokodolobha yesifundazwe, nobuye ube yidolobha lesibili ngobukhulu unesithombe esibi emphakathini, kwabamabhizinisi nakubatshalizimali. Lesi simo sabe sidala ukulahlekelwa yithuba lokuheha abatshalizimali nokuhlonipheka njengenhlokodolobha.
Akukho ukungabaza ekutheni umphakathi nabamabhizinisi bazobe bebheke ukunyathela kwalobu buholi, phezulu eqhulwini ubunye ekwenzeni izinto ezizoyisa uMsunduzi phambili.
Ukuhlelwa kabusha kwamakomidi
Amakomidi oMkhandlu ayinjini njengoba emqoka ekuqinisekiseni ukuthi uMasipala wenza okuklanywe nguMthethosisekelo kanye nemithetho elawula ukusebenza koHulumeni Bendawo.
Lamakomidi abunjwa ngokweSigaba 80 ukuze axhumane abuye enze izincomo eSigungwini eSiphezulu. UMkhandlu unamakomidi ayisithupha, futhi wonke amelelekile kuwo wonke amakomidi. Amalunga eSigungu eSiphezulu athweswe umsebenzi wokuba ngosihlalo bamakomidi alekelelayo. Nanka amakomidi:
IKomidi Elibhekelela Isabelomali Nezengcebo: USihlalo waleli Komidi yiMeya iKhansela uMzimkhulu Thebolla.
ISigungu Esiphezulu naMakomidi Ezezimali anomthwalo wokuqinisekisa ukuthi izimali zikaMasipala zisothini. IKomidi leSigungu Esiphezulu lisemqoka kakhulu esakhiweni sokuthatha izinqumo, esihlangana maphakathi nemihlangano yoMkhandlu.
IKomidi Elibhekelela Izinsizakalo