W
ONKE umuntu uyagijima, yilowo naloya ucabanga indlela okumele usuku kanjalo nenkulumo okumele ibekeke ngayo. Amaphaphu aphezulu ngoba kulabo abayiziphathimandla akekho ofuna ukwenza iphutha ngoba nakanjani ‘iMeya akumele iphoxeke ngosuku lwayo olukhulu’. Babodwa abathi lona akube ngumcimbi omkhulu kanti abanye bathi cha akube nje yinto encane, lapho iMeya izokwethula inkulumo yayo kumakhansela kube sekuphelile njalo. Nokho amathimba onke ayavumelana ukuthi phela lolu akulona udaba losopolitiki neziphathimandla kuphela kepha ngolwabantu bonke boMsunduzi.
Udaba olusezithebeni wusuku lapho iMeya, ikhansela uMzimkhulu Thebolla kumele yethule umbiko kubantu baseMsunduzi. Njengephephandaba sithole ithuba lokuthi sikhulume neMeya. Umhlangano ubungehora leshumi. Kuthe kungashaya isikhathi ngezwi eliphansi uThebollla wazisa izintatheli ngobumqoka bomhla ziyisithupha kuZibandlela.
“Kimi lolu wusuku olumqoka futhi alukho ngami noma ngathi njengabaphathi boMkhandlu. Lolu wusuku lokubuyisa impendulo kubantu esahamba sicele ukuba basinike ithuba lokuyosinga ekutheni inkinga ikuphi nokuthi ikhambi lingaba yini. Ngakho kimi ngalolu suku ngizokwethula isithombe sezinsuku ezili-100 njengoba sinjalo, esikhombisa okuhle nokubi okwenzeke ngalesi sikhathi. Ngalokho angidingi maqhinga, ngidinga ukukhuluma iqiniso”, kusho uThebolla.
Ebuzwa ukuthi lithini iqiniso uthe: “Iqiniso lokuqala wukuthi isimo uMsunduzi obungaphansi kwaso besenza abantu baseMsunduzi okuyizakhamuzi, osomabhizinisi, amakhansela nezisebenzi babe nokuzenyeza nokuphoxeka. Uma njalo kukhulunywa noma kubikwa ngendawo yangakini kuhlale kuvela amachilo ugcina ungasaziqhenyi ngayo. Lo muzwa ubusukhona kubantu abaningi,” kuchaza iMeya .
Uqhube wathi “Ngenxa yalokhu kube mqoka ukuthi njengobuholi obusha siqale ngokubuyisa ithemba nokuziqhenya kubantu baseMsunduzi. Imihlangano esibe nayo nezinhlaka ezahlukene nayilapho sizwe izikhalo sabuye saxoxa ngezixazululo. Umuzwa wami uthi abantu basinike ithuba lokulungisa lapho kwabe konakele khona nokuyinto esesiyiqalile kulezi zinsuku ezili-100.”
Uveze ukuthi ngesikhathi bethatha njengobuholi obusha zibe zine izinto