WeMeya wezinsuku ezili-100
Genhloso yokuthola isixazululo
lixoxwe ngoba isimo lesi sesiqalile ukuba nomthelela ongemuhle kwazise ukwehla kwesabelomali noma isikhwama sisho kokunye ukuncipha kwezinhlelo ezithile kanjalo nezinga lokwenza. Uveze ukuthi uMasipala unalo uhlelo lokubonelela labo okunobufakazi bokuthi kabanawo amandla okukhokha nolulawulwa wumthetho kanjalo nenqubomgomo ekhona.
Ubuye wavuma ukuthi kwesinye isikhathi ngale kwepolitiki yamaqembu bebezigwaza ngowabo ngalesi simo.
“Okunye okwaphakanyiswa kwakuyizikhalo ezifanele ezinye zinenhlese yezepolitiki ziqutshulwa okwakwenzeka okwakudodobele ekuqaleni, njengokuqashwa kwababesebenza ngokwenkotileka, izindaba eziphathelene nomnyango wezemfucuza, abezemigwaqo, abezinkontileka ezicisha amamitha kagesi nokunye. Konke lokhu kube nomthelela ekusebenzeni kwethu, ekuqoqeni ingenisomali osekubeke ukusimama kwezimali zikaMasipala engcupheni.”
Okunye athe uMasipala wazigwaza ngowawo kukho yisimo sedolobha.
“Liyinhlekelele enkulu imaphakathi loMsunduzi, kuhlengezela izinyembezi uma ngibona inkaba yedolobha iguge inje. Amandla emaphakathi ledolobha adonseleke emuva ngokuvumela ubudlobongela, ubugebengu, ukuxhathuka nezakhiwo ezingenamuntu ezinganakiwe. Sesithule isikhathi eside savumela imaphakathi ledolobha lagutshezelwa ubugebengu, abahweba ngezidakamizwa nabaqashisa ngezindawo ezenziwe imijondolo. Abaqashi abaningi abathembekile sebebalekile enkabeni yedolobha, izingane ezihlala emgwaqweni zihlala emarobhothini emini zilale onqenqemeni lwemigwaqo ebusuku, amashibhi sekuyona mpilo yenkaba yedolobha,” kuchaza uThebolla nothe konke lokhu kuzoba ngumlando.
Ukuphathwa kwezimali ngesinwe
Khona lapho ukuvumile ukuthi enye yezinto okumele ilungiswe wukusetshenziswa kwezimali nokuthinta indlela yokwelusa izinkontileka nokuyinto eyenze lo Masipala wangena ngaphansi kwesandla soMlawuli.
“Siyakuncoma ukuthi samukele okungachazwa kuphela ngokuthi yisakhiwo esiwumasipala esinezinselelo ezinqala kwasiphoqa ukuba sibe ngaphansi kweSigaba 139 okwenze uMlawuli wethu, uMnu uSibusiso Sithole osenathi namhlanje, abe negunya lomele uNdunankulu. Izinkontileka ezingekho emthethweni namaphrojekthi abizayo adinga ukuba aqedwe kuthi amanye angenziwa singaze siwabone ephela,”kuchaza uThebollla.
Elokuba khona kwabaphathi nabasebenzi abanamakhono afanele uligcizelele waveza nokuthi kunohlaka olusadingidwa nabamele abasebenzi nonhloso yalo kuwufolisa kahle iminyango kanye nezisebenzi ukuze zilungele inhloso.
“Njengengxenye yokuzinzisa idolobha, ukufuna abaphathi abaphezulu abanolwazi nabaqeqeshiwe kuseqhulwini ikakhulukazi uma sibheka ukuthi izikhundla ebeziphethwe ngababambile kube nesidingo sokuthi ziqedwe, okuyizikhundla zaBaphathi Abaphezulu nezinye zeZinhloko Zophiko Lwamabhizinisi. Kuze kube manje sisemkhankasweni wokuphothula ukuqashwa kweMeneja Yedolobha kanye nokhlwaywa wesikhulu esiphezulu kuzoqala ngokuzimisela,” kuchaza uThebolla.
Kule ngxoxo uThebolla uthi uMasipala ukhathazwa kakhulu ngabantu abaqhwaga umhlaba. Uthi ziningi izigameko ezibikwa kubo zabantu abagxumeka izakhiwo ezindaweni zikaMasipala kube nzima ukubhekana nabo ngoba abaqaphi namaphoyisa ababhekene nalokhu baseyidlanzana.
Uncome iqhaza lezimboni ezizimele, kwathiwa zisebenza kahle noMasipala ukuze kuthuthuke futhi kukhule umnotho wendawo. Izinhlangano ezingekho ngaphansi kukaHulumeni, ezaziwa ngamaNon Governmental Organizations (NGO), nazo zichonywe uphaphe lwegwalagwala iMeya yathi ziyaweseka uMasipala, wabalula i-Active Citizen Movement, iLove PMB Community, iMidlands Medicentre neSave Supermarket.
Kuzoqiniswa nezinhlelo zokusiza umphakathi uma kunezinhlekelele njengezikhukhula nokuduma kwezulu njengoba kusehlobo. IMeya idalule nokuthi kuzohehwa izifundiswa ezinamakhono ekuphatheni uMasipala nasezikhundleni eziphezulu.