U
KUXHUMANA nezinhlaka ezahlukene ngaphandle nangaphakathi koMsunduzi kuhlose ukwandisa ulwazi nokuthola izixazululo. Ubuholi obusha obuholwa yiMeya uMzimkhulu Thebolla sebuthathe igxathu elibalulekile kuyo yonke indawo ukuba kusetshenziswane nalabo abanentshisekelo. UMasipala ubuye wabambisana neminye iminyango kaHulumeni nezinhlaka zomphakathi ukuthuthukisa ukulethwa kwezinsizakalo.
Ngokuqonda izinselelo zoHulumeni Bezindawo jikelelele, kulezi zinsuku ezili-100 iMeya uMzimkhulu Thebolla ayibanga namahloni ukuthekela ulwazi ngaphakathi nangaphandle koMsunduzi. Ichaza lokhu iMeya ithe:
“Ulwazi lungamandla, ngakho ukuphuma kwethu sizingele ulwazi akumele kubukwe njengento embi kepha njengento ezokhuphula indawo yethu. Khumbula siyiNhlokodolobha ngakho kumele sifunde nakwabanye ongoti abasebenza nabasezindaweni ezehlukene,” kusho iMeya.
Iqhube yathi uhambo lwayo lokuyothamela ingqunguthelya yongoti ebisoKhahlamba muva nje kwalekelela kakhulu ekuqondeni ukuthi kuthini ukukhuluma lapha phandle nathe ulwazi aluthola khona useqalile ukulutshala eMsunduzi.“Selokhu siqalile njengobuholi obusha sihlangana nabantu abehlukene, kubo bonke bayamukela ukuthi lesi yisiqalo esisha futhi umlayezo munye vo abawubhekise kithi, uthi: ‘Qalani kabusha, vukani nizithathe’ nokuyinto esizimisele ukuyenza,” kusho iMeya ngeqholo.
Odabeni loMlawuli nojutshwe nguHulumeni uthe ngenye yezinto ezingelula ukuzelusa njengoba abanye becabanga ngoba zifuna ukuqonda nesineke.
“Njengoba wonke umuntu azi ukuthi ngithe ngifika bekunoMlawuli, okuyinsizwa engiyihlonipha kakhulu, umfo kaSithole. Uyabona uSithole uyikhonco elixhumanisa uHulumeni kazwelonke nowesifundazwe ngakho uma siqala nje kumele ngiqinisekise ukuthi wonke umuntu uyamukela ukuthi uMsunduzi (ngoSithole) usebenza noHulumeni abehlukene nokumqoka ukuthi esikwenzayo kuyaphumelela,” kusho uThebolla.
Uqhube wathi kuyishwa ukuthi abanye babona sengathi ukungena koMlawuli yisijeziso: “Khumbula singuHulumeni oyedwa ngakho uma kukhona phakathi kwethu odinga usizo siyalekelelana.
Kimi uMlawuli ngimthatha njengomunye wethu, umehluko wukuthi yena uzele okuthile okungahambi kahle kithi nokuzothi kungedlula aphinde asishiye, sizihambele njengoMasipala”, kuchaza iMeya. Uthe weneme ngezinhlelo eziholwa nguMlawuli futhi wakuqinisekisa ukuthi sekukhona ukukhanya nathe konke kungenxa yokubambisana phakathi kwazo zonke izinhlaka.
Ubumqoka kwabamabhizinisi
Khona lapho uhlaka athe lumqoka ekusheshiseni izinhlelo zokuqhubela uMsunduzi phambili yilolo losomabhizinisi kakhulukazi bendawo: “Ngitshele nje ukuthi yiliphi izwe noma uHulumeni osimamayo uma engabambisene nosomabhizinisi?” kubuza yena.
Wazise leli phephandaba ngemihlangano abe nayo nezinhlaka zosomabhizinisi nathe uzuze lukhulu kuyo. Lokhu kunanelwe nguMnu uBongi Mshengu wePietermaritzburg Chamber of Business nozwakalise ukuhlabeka umxhwele. “Sijabule kakhulu ngokuxhumana noMasipala, sigqugquzelekile futhi sesibheke phambili ngokubambisana ekutholeni izisombululo,” kusho uMshengu. Akugcinanga lapho njengoba kube nesidlo ngaphansi kweCEO’s Forum Business Dinner, nathe lesi bekuseyisiqalo senkundla yokuxhumana.
Cishe isivivinyo sokubambisana kulezi zinsuku ezili-100 sibonakale ngesikhathi kuvela inhlekelele yalapho kulahlwa khona udoti kwaqubuka umlilo owubuhanguhangu. Kulokhu iMeya ithe:
“Ubukhona nokuqina kokuxhumana nokusebenzisana bubonakala kakhulu uma kunenkinga, nathi sike saba nenkinga yokusha kwendawo kadoti nakuyilapho sibone cishe zonke izinhlaka zikaHulumeni, abamabhizinisi nomphakathi besibungazile sakwazi ukubhula umlilo. Siyazi akuphelile kepha noma siyaphefumula kube yikho ukusebenzisana esibe nakho nazo zonke izinhlaka.”
Ukubambisana lokhu kube nezithelo njengoba kukwazi ukutholela intsha yendawo ebalelwa ema-490 imisebenzi yesikhashana nezokwazi ukuxosha ikati eziko ngaphansi kohlelo lwe-Extended Public Works Programme (EPWP) olungaphansi koMnyango Wezemisebenzi. Isivumelwano esaba khona phakathi kwe-Agri-business Development Agency [ADA] noMasipala uMsunduzi sokuba kube nohlelo lokuqeqeshwa, i-Agri-Tech Skills Training oluzobuye luhlomulise intsha.
Igcizelela ngokubambisana iMeya ithe uma zonke izinhlaka zihloniphana akukho okuyovimba ukusebenzisana nokuyinto okungafanele igcine ngomuntu lowo kepha ibe ngeyohlaka lonke.