Iqhaza le-Team of Choice emnothweni woMsunduzi
Nawe Msunduzi awumncinane: IMaritzburg United ilenyusile igama ledolobha ngokwenza kahle kwezikanobhutshuzwayo
UKWENZA kahle kweqembu likanobhutshuzwayo laseMsunduzi iMaritzburg United kuletha ithemba ngentuthuko yomnotho wendawo.
U-Eric Tinkler ongumqeqeshi waleli qembu ufike lisanqobe umdlalo owodwa emidlalweni eli-16 wakwazi ukuguqula izinto lakwazi ukuvika izembe sekudlalwa imidlalo yokuhlungela indawo ku-Absa Premiership nalapho ladlula ngehubo. Selokhu afika, iTeam of Choice isidlale imidlalo engama-31 yahlulwa kweyisi-8 yanqoba eli-13. Usefake leli qembu emdlalweni wamanqamu okokuqala emlandweni walo njengoba lizodlala neMamelodi Sundowns koweTelkom Knockout eMoses Mabhida Stadium.
Lokhu kwenza kahle kushayelwe ihlombe nayiMeya kaMasipala uMsunduzi uMzikhulu Thebolla othe, “SinguMasipala nomphakathi waseMgungundlovu sizishaya isifuba ngokwenziwe iqembu lethu iMaritzburg United. Ngithanda nokudlulisa ukubonga kubadlali, umqeqeshi kanye nabaphathi beqembu ngabakwenzile, sithi siyaziqhenya ngabo.”
UThebolla uphinde wayifisela inhlanhla emidlalweni yayo elandelayo ikakhulu owamanqamu eTelkom Knockout.
UMasipala uMsunduzi uxhase leli qembu ngezigidi eziyisi-R9 ngonyaka, inkontileka yalolu xhaso iyiminyaka emithathu kusuka ngowezi-2018 ngesikhathu ivuselelwa.
Ukwenza kahle kwaleli qembu akugcini ngokufukula umnotho kepha nezikhulu zikaMasipala ziyabona ukuthi awuliphosi emgqonyeni ongagcwali uxhaso lwayo.
Lokhu kwenza kahle kwaleli qembu kuzovundulula namakhono kubadlali abadlala emaqenjini amancane kule ndawo njengoba amaqembu azophokophela kuyo ukuzobheka abadlali. UMgungudlovu unomlando wokuba isizinda esikhiqhiza abadlali abasezingeni kubalwa uDumisani Zuma, uNkosingiphile Ngcobo abadlala kuKaizer Chiefs, uBandile Shandu, uBongokuhle Hlongwane abagijima kuyona iMaritzburg United, uKhulekani Madondo odlala kuBaroka FC noSphesihle “Mbesuma” Ndlovu ogijima ku-Orlando Pirates.
Phambilini lesi sifunda sikhiphe abadlali abafana noMbulelo “Old John” Mabizela ogijime ku-Orlando Pirates, iSundowns nakuTottenham Hotspur yaphesheya kwezilwandle; noSandile “AK47” Ndlovu odlalele iMoroka Swallows neBloemfountein Celtic.
Ukwenza kahle kweqembu kufeza izifiso zomqeqeshi. Emveni kokusindisa iqembu ezembeni, ekuqaleni kwale sizini uTinkler wakubeka kwacaca ukuthi isifiso sakhe neqembu ukuqeda kuTop 8 bese benqoba isicoco esisodwa kobe konke sekufeziwe. UDaylon Claasen oyinjini yaleli qembu wavumelana nalo mqeqeshi ngesikhathi efika kuqala isizini ukuthi okumenze wazolidlalela yingoba efuna ukulisiza lenze kahle. Wathi lokho kuzokhonjiswa ukuqeda kuTop 8 nokunqoba isicoco. Indlela ebheke kulezi zifiso ibukeka ivuthwa. IMaritzburg United ingelinye lamaqembu ayisi-8 ahamba phambili kuPSL emveni kwemidlalo eli-12 iphinde ibe sethubeni lokunqoba iTKO.
Lokhu kuba sefomini kwezika Farook Kadodia kuzophinde kwandise nezihlwele ezivela kuso sonke isifundazwe nakwezinye ezizobe zizobuka imidlalo enkundleni iHarry Gwala. Lokhu kwanda kwabalandeli kuzohlomulisa idolobha ikakhulukazi osomabhizinisi abasakhula abadayisa ngaphandle kwenkundla njengoba bezobe bedayisela lezinkumbi zabalandeli, imboni yezokuthutha izohlabana njengoba kuyiyona ezothutha abalandeli ukuya nokubuya ezinkundleni. Izindawo zokulala, ezokudlela kanye nezokucisha ukoma ngeke zisale ngaphandle kwabazohlumula ngokutheleka kwalezi zinkumbi zabalandeli.
Lokhu kuzophinde kwandise amathuba emisebenzi kulezindawo ezizohanjelwa izibukeli. Ezokuvakasha zizohlomula njengoba igama ledolobha selingundabizekwayo. Kubalelwa ekutheni isivakashi esisodwa sakha amathuba omsebenzi ayi 8.
Uma iqembu lenza kahle iyanda imisebenzi edolobheni njengoba kunemidlalo eyengeziwe eliyidlalayo, eminye liyidlalela ekhaya. Lokho kusho ukuthi baningi abantu abadingekayo njengabaqaphi, abezimo eziphuthumayo, abezokuthutha. Izisebenzi zisebenzisa imiholo yayo kuleli dolobha okuzophinde kuzuzise osomabhizinisi kufukule nomnotho wedolobha. Ukwenza kahle kweTeam of Choice kuzoyisondeza nezinkampani ezinkulu ezizofuna ukuzibandakanya nayo uma ngabe yenza iminikelo emphakathini waseMsunduzi. Nosomabhizinisi bangaphandle bazofuna ukuzotshala izimali ngenxa yezinga labantu abahambela leli dolobha. Lokhu kungenxa yokubona ithuba lokwenza inzuzo njengoba bebaningi abantu abahambele leli dolobha. Nabahleli bemicimbi eyahlukahlukene bazofuna ukuhlelela imicimbi yabo kule ndawo ngenxa yesibalo esihambela imidlalo yeMaritzburg ngethemba lokuba nabo kuzophuma nesidolo bakwazi ukwenza inzuzo.
Uma ngabe iMaritzburg United inqoba iTKO izogoduka nezigidi ezi-R4 kanti uma iqeda endaweni yesibili izohlabana nesigidi esi-R1,5. Abadlali bazobe sebethola amabhonasi, ingxenye yale mali bazoyisebenzisa eMgungundlovu okuzozuza osomabhizinisi. Ngisho nabadlali abangebona abalapha bayasiza kwezomnotho ngoba kufanele bakhokhele izindawo zokuhlala kanye izidingo zansuku zonke.
Okunye okulindelekile kulokhu kwenza kahle kweTeam of Choice ukunyuka kwesibalo sabalandeli abathenga ijezi leqembu okuzonyusa imali. Ngakho-ke emidlalweni yeMaritzburg United yasekhaya nasedolobheni kungase kube luhlaza okwesibhakabhaka.
Leli qembu lidlala imidlalo yalo yasekhaya enkundleni iHarry Gwala emumatha abalandeli abayizinkulungwane ezili-12. Igcwala ivale ngomuntu ngaso sonke isikhathi uma iMaritzburg United idlala. Abalandeli sebekhombise ukuba isithako kuleli qembu njengoba le nkundla isiyikwamphela ndaba.