Umsebenzi omuhle: Isihlangu sikaSithole sedluliselwe kuDuma
NGOKWEJWAYELEKILE uma uMasipala ungena ngaphansi kukamlawuli kuke kunganambithisiseki kahle, kodwa iqiniso ukuthi umlawuli usuke ezofaka igxalaba kulaba abayilimayo vele indima.
Uma kufika kuMsunduzi, isinqumo sokuthi ufakwe ngaphansi koMlawuli kanjalo nokuqokwa kwalowo onguMlawuli sekube nezithelo ezinhle. Yize kusekuningi okumele kwenziwe, indlela iya ngokukhanya, kulokhu kutuswa uholo oluhle lukaSithole.
NgoNhlolanja nonyaka, uMnyango Wezokubusa Ngokubambisana Nezindaba ZobuKhosi, umemezele ukuthi uSithole usejutshwele kuMasipala Wesifunda Ugu. Waphinde wamemezela ukuthi indawo yakhe izothathwa uMnu uScelo Duma.
UDuma akasilo ivukane, njengoba enguMqondisi Omkhulu Wezokubuswa Nokuphathwa Komasipala eMnyangweni, kanti nezinkinga ezikhungethe uMsunduzi uzazi njengoba ezazi, njengoba elilungu leTechnical Waroom laseMsunduzi. ITechnical Waroom yilapho kulethwa khona izixazululo oPhikweni noPhiko olunenkinga. Ngendlela esemqoka ngakhona le Waroom iqala ngehora lesi-6 ekuseni. UDuma uyingxenye yalabo bantu abafika ngovivi bezothola izixazululo.
UDuma wethembise ukuthi uzokwenza konke okusemandleni ukulekelela uMsunduzi khona uzokwenza kahle. UDuma uthe; “Imina owabhala incwadi ngibika ukuthi uMsunduzi uyadinga ukulekelelwa uHulumeni wesifundazwe, ngangikwenza lokhu ngoba umthetho uyakuvumela ukuthi uHulumeni weSifundazwe ungenelele uma ubona uMaspala ungenzi kahle, ikakhulukazi kwizinsiza ekulindeleke ukuthi uzenzele umphakathi wawo.”
Uthe ezinye zezinkinga ezihamba phambili ukulawulwa kwemfucuza, lokho uthe kumele kusombululwe ngokukhulu ukushesha. Uqhube ngokuthi selokhu afika eMsunduzi ngoMbasa nyakenye, uzibandakanye nezinhlelo ezisemqoka ababona ukuthi zizolekelela ekutheni uMasipala wenzekahle kulokho okulindeleke kuwo.
“Sisebenza ngokukhulu ukuzimisela ukuqinisekisa ukuthi ukulawulwa kwemfucuza kusetshenzwa kahle, olunye udaba oluseqhulwini kithina yindlela okulawulwa ngakhona imali kuloMaspala,” kusho uDuma.
Uqhube ngokuthi ngeke akuthole ukuphumula uma izakhamuzi, amabhizinisi kanye neminyango kaHulumeni bengakazikhokhi imali abayikweletayo. “Kunzima ukuthi uHulumeni afake imali uma uMaspala nanoma imuphi uhluleka ukuqoqa imali. IMnyango kaHulumeni, amabhizinisi kumele akhokhe, engingakuqondi ukuthi yini le ebivimbela uMaspala ukuthi uvalele iminyango kaHulumeni izinsiza, ngoba kumele engabe yibo abakhombisa umphakathi ukuthi kwenziwa kanjani, futhi okukhulu ukuthi lezo zisebenzi zeMinyango eziningi zazo ziyizakhamuzi zaseMsunduzi, zizobe sezikhononda ngokwantuleka kwezinsiza,” kusho uDuma.
UDuma uthe asefike wakuthola ukuthi abasebenzi sebenesiko elingelihle, okumele liguqulwe futhi ngokukhulu ukushesha. “Kulo Masipala kumele kuqiniswe kakhulu ukuthi loyo ongenzanga kahle, ajeziswe, ngoba iyona ndlela okwenziwa ngayo endaweni yokusebenza, uma kuzoqhubeka ngokuthi kube ikampunzi idla emini ngeke kuyiwe ndawo, ukusebenza kuqala kwizisebenzi, bese kwehle njalo kuze kufinyelele emphakathini.”
Uqhube ngokuthi uma abantu bezitshela ukuthi ukuhlinzekwa ngezidingo kubi edolobheni, abake bavakashele e-Edendale kanye naseVulindlela, kulezindawo uthe umphakathi ushoda ngamanzi, ukumukezela umphakathi ngogesi ubona uMaspala wenza kahle ngalapho.
Ekhuluma namakhansela uDuma uthe; “Makhansela angizelanga lana ukuzoxazulula izinkinga zenu, kodwa ngizele lana ukuzoqeqesha, ngiphinde ngiqinisekise ukuthi lokhu esifuna ukukuzuza kuyenzeka, ilokho okubizwa ngokungenelela nokungumsebenzi kaMlawuli, futhi ekumele nikwazi ukuthi loluhlelo alwakhelwanga ukuthi lube olwesikhathi eside,” kusho uDuma.
“Umsebenzi omningi sewenziwe, okumqoka ukuthi singaqhamuki nezisombululo zesikhashana kepha kube ezizolungisa izinkinga ziphele,” kulanda uDuma.
Uphethe ngokuthi uMnyango Wezokubusa Ngokubambisana Nezindaba ZoBukhosi usehlelweni lokuqasha umlawuli ozosebenza eMsunduzi njengoba yena esabambe okwesikhashana. “Lokhu akukusha kuHulumeni kujwayelekile, kwenzeka eMzinyathi kanye naseMadlangeni uma ngingasho oMasipala abaseduzane noMsunduzi, ngiyazi sizosebenzisana kahle noMsunduzi, ngingumuntu okhuluma izinto njengoba zinjalo, ezinkingeni zepolitiki zona angizingeni ngoba angifuni zithikameze ukusebenza kukaMaspala.
IBamba Meneja uNkk uNelisiwe Ngcobo uthe uDuma insizwa esibe namagalelo amakhulu ezinhlakeni zikaHulumeni Wasekhaya, njengoba eseke waba iMeneja kaMasipala. “SinguMsunduzi siyamemukela uDuma futhi sithemba ukuthi sizosebenzisana naye kahle, nginxusa nezisebenzi ukuthi zibambisane naye khona kuzoqhutshekwa kuyiwe phambili.”
IMeya uMzimkhulu Thebolla isike elijikayo yathi bayamemukela uDuma futhi kulokho akwenzayo bazomeseka. “Ngizokwenza isiqiniseko sokuthi ipolitiki ayizokugxakumbela ekusebenzeni kukaMasipala, kepha sonke sizokwenza isiqiniseko sokuthi sizosebenzela izakhamuzi zaseMsunduzi,” kugoqa iMeya.