Impumelelo yoMsunduzi eyesiFundazwe
UHulumeni wesifundazwe akamile kepha welusa isinqumo sakhe sokungenelela khona lapho kuyavela ukuthi izinto ziyenzeka
IQINISO lithi ukufakwa kukamasipala noma ngabe yimuphi ngaphansi komlawuli akusona isijeziso kepha wuhlelo lokulungisa isimo. Kufana nje nokugula komuntu bese eya emtholampilo ngenhloso yokubhekana nesimo sempilo ukuze abuyele esimweni. Lokhu kube sobala ngesikhathi iSigungu sikaHulumeni waKwaZulu-Natal sijuba uMphathiswa ukuba phakathi kokunye ezokwelusa uhlelo lokungenelela. Emhlanganweni wakamuva bekukhona uMhlonishwa uRav Pillay, iMeya yoMsunduzi ikhansela uMzimkhulu Thebolla, iSekela Meya ikhansela uMahnilal Inderjit, uSomlomo ikhansela u-Eunice Majola, uSotswebhu ikhansela uVusi Ntshangase kanye noMlawuli uMnu uSibusiso Sithole. Omunye obekhona yilungu elinamava kuHulumeni nowake waba ngumphathiswa koHulumeni Bendawo uMnu uMike Mabuyakhulu.
Akuyona imfihlo ukuthi phezulu eqhulwini lo Masipala, uMsunduzi, uzibophezele ekulungiseni isimo sezimali. Ukuvakashela kukaPillay kumqoka ngoba phela nguye ophathiswe ezezimali nokungathi uma izeluleko zakhe zamukelwa kube lula ekuphumeni obishini kukaMasipala. Okukhuthazile ngalo mhlangano wukuthi bonke abathintekayo bebekhiphelana izifuba ngalokho okuyinkinga kanjalo nezixazululo eziphuthumayo.
Kulo mhlangano kuvelile ukuthi yize uMasipala unenkinga yezimali kepha ikhona imali eningi okweletwa yiminyango kaHulumeni. Kuvele ukuthi inani elikweletwa yiminyango kaHulumeni kuMaspala lilinganiselelwa ezigidini ezili-R180. Njengenxenye yokuvulelana izifuba udaba lokungcola kwedolobha lubukiwe kwamukelwa ukuthi yize kukhona okwenziwayo kepha kuningi okusengenziwa. Okunye okuvelile ngaphansi kwalesi sihloko wukuthi kunezinsizakusebenza ezebiwe yizinswelaboya, kanti ezinye zifile, nokuthikameza indlela izisebenzi ebezihlele ukuthi zizosebenza ngayo. Kube ngu ‘elethu’ ekutheni phezu kwezingqinamba abantu baseMsunduzi bafanelwe ngokungcono, ngakho kuyomele kuqhutshekwe nokutholwa kwesixazululo esipheleleyo.
Odabeni olubucayi nolumayelana nokulondolozwa kwabathandiweyo, umhlangano wathola umbiko othokozisayo. Kwavela ukuthi zisahamba kahle izinhlelo zokulungisa amathuna iMountain Rise. Kulokhu kwenzeke okungajwalyelikile ngesikhathi uMasipala uzinuka amakhwapha uvuma ukuthi ezinye izinkinga zidalwa yiwo qobo ngasohlangothini lwezisebenzi. Isibonelo kube wudaba lukagesi kanye nezokuphepha. Abamele uMasipala bavumile ukuthi bangenza kangcono kunalokhu isimo esiyiso njengoba amalambu kwezinye izindawo engakhanyi nokubeka umphakathi engozini. Khona lapho namalungu omphakathi aphathekile njengembangela njengoba kuvele ukuthi akhona akokotela ugesi nokuvame ukuba nomthelela ekudlakazekeni kwengqalasizinda.
Kuvele ukuthi uMasipala unesibalo esiphezulu sabantu abadla izindawo. Lena yinkinga kuzwelonke kepha uMsunduzi ukuvezile ukuthi zikhona izinhlelo zokubhekana nalesi simo. Umhlangano uvumelene ngobumqoka bokuvikela umhlaba kaMasipala nowamabhizinisi ngenhloso yokuqinisekisa ukuthi umnotho wendawo kawuphazamiseki.
Kulo mhlangano isithombe sibe sobala ukuthi uHulumeni wesifundazwe uyafisa ukuthi uMsunduzi uphume otakwini noluyinto engeyinhle kubantu nasemnothweni wendawo kepha nowesifundazwe iKwaZulu-Natal, uMsunduzi oyinhloko yayo.