Kuhloswe ukuthuthukiswa kwezokungcebeleka eNhlokodolobha
EZOKUNGCEBELEKA zibamba iqhaza elingangama-8.6% emnothweni wakuleli ngokwemibiko eyathulwa inhlangano iWorld Travel & Amp; Tourism Council. UMasipala uMsunduzi nawo unesifiso sokuthuthukisa ezokungcebeleka, kanjalo nokunyusa inani lezivakashi ezingavakashela leli dolobha ikakhulukazi njengoba liyiNhlokodolobha yesifundazwe iKwaZulu-Natal.
OnguMqondisi weMsunduzi Pietermaritzburg Tourism Association uMnu uDumisani Mhlongo uthi;
“Izibalo zibe zinhle kakhulu ngesikhathi sikaNcibijane wonyaka wezi2019 uma uqhathanisa nowezi-2018. Lokho-ke sasikubona ngamehlo ngoba thina la eMsunduzi asinayo iTourism Satellite Account, okuyiyo esebenzisa ubuchwepheshe ukuthi kutholakale inani lezivakashi ezibuthane kuleli dolobha. Ukubona kwethu ukuthi izivakashi beziningi kakhulu sibone ngokuthi sandile isibalo sabantu abebethamela imicimbi ebikhona kanjalo nalabo abebeya ezindaweni zomphakathi ezinjengamapaki.”
UMhlongo uthe khona kukuhle kunjalo kodwa kukhona la okumele balungise khona njengokwenza iziqiniseko sokuthi umthetho uyalandelwa futhi uyahlonishwa, kanye nokwandisa izinsiza ezilekelela ukuthi indawo igcineke ihlanzekile njengemigqomo yemfucuza kanye nocwazi bokufaka imfucuza.
“Akusithina sodwa esibe nesibalo esiphezulu sabantu abavakashile, ngeke size sikubalekele ukuthi
eThekwini baba nesibalo esiphezulu sezivakashi kodwa bayakwazi ukubalawula, ukuthi abantu kumele baziphathe kanjani futhi bayakwazi ukuzama ukuqinisekisa ukuthi indawo igcineka ihlanzekile. Lokho nathi okumele sikufunde.”
UMqondisi ubonge ukusebenzisana noMnyango Wezokuthutha kuzwelonke, kanye nenhlangano iSouth African National Roads Agency Limited (SANRAL) ngokusebenza ngokubambisana ekutheni bafinyelele kubantu baseMgungundlovu. “Into esilekelele kakhulu ukuthi besinenhloso yokufinyelela kubantu ababodwa, futhi sidlulisa umyalezo owodwa ukuthi zikhona izindawo zokujabula kodwa akungaphulwa umthetho nokungaholela ekutheni kube nezingozi zemigwaqo, abanye baze baboshwe,” kusho uMhlongo.
Uqhube ngokunxusa abahleli bemicimbi ukuthi bangaqhudelani ngokwemicimbi kepha abahlele eyabo ngokuthi banikezelane amathuba khona bonke bezokwazi ukwenza inzuzo. “Inkinga ngendawo yaseMgungundlovu indawo encane, uma uke wenza iphutha lokwenza umcimbi uqondane nomunye kuyazwela ngoba abantu bagcwala komunye bayeke omunye, nginxusa abahleli bemicimbi ukuthi babe nokuxhumana khona bezokwazi nabo ukwenza inzuzo ngoba kuyenzeka kube nemicimbi emihle yomibili inkinga ukuthi iqondanile kanti uhlobo lwabantu okuyilo ebelihlosiwe ngelilodwa nokuholela ekutheni umuntu akhethe ukuya emcimbini owodwa,” kulanda uMhlongo.
Uthe into abafisa ukuzithuthukisa ngayo ukuthi babheke ukuthi yini eheha abantu kakhulu eMgungundlovu. Kuleli dolobha into eheha abantu kakhulu umlando, kungaba ngokokucindezelwa kwabantu kanjalo nokulwela umzabalazo, ilokho kuphela esinakho.
Uqhube wathi idolobha lingcole kakhulu alisalekeleli ekutheni kuheheke abantu, lokhu kuyabalimaza ngoba iyona ndawo izivakashi ezifikela kuyona ngaphambi kokuthi baphokophele ezindaweni abebehlose ukuya kuzo. Ube esethi bona benguMsunduzi ngeke baziqhathanisa neTheku ngoba iTheku njalo uma kunesabelomali liyayikhipha ebhekelele ezokungcebeleka, lokhu okungenzeki eMsunduzi ngoba lona usagxile kakhulu ekuhambiseni izinsiza emphakathini, kwazise abantu abaningi abazinze kuleli dolobha babheke ukulekelelwa nguHulumeni.
“Manje sihlose ukuhlela imicimbi kusenesikhathi khona kuzothi uma kunesivakashi esihlose ukuyovakashela eThekwini sazi ukuthi kunomcimbi omnandi oseMgungundlovu angakwazi ukuya khona kuthatha imizuzu engama-45 uma ushayela kuphela, ngalokho sihlose ukusebenzisana kakhulu nalabo ababhekelele ezokungcebeleka eThekwini,” kuchaza uMhlongo
Uphethe ngokuthi eMgungundlovu izivakashi ezilinganiselwa ema-80% zisuke zihamba ngezinyawo, okunye okuyinselelo ababhekana nayo ukungcola kwalezi zindlela ezakhelwa ukuhamba izivakashi njengeTheatre Lane kanye noGalway Lane, “okumangazayo ukuthi owayehlela idolobha wayazi ukuthi izivakashi zizohamba kanjani, manje sekuyinselelo ukuhamba kwezivakashi kulezi zindawo ngoba sekuyangcola kugcwala nezinwele, njengeTheatre Lane okuyindawo esivele igcwale izinwele ngenxa yezindawo zokulungisa ikhanda ezigcwele khona kanti lezi zindawo yizona ezinomlando,” kuchaza uMhlongo.