UMkhandlu neqhingasu lokwenza o
Kuhlangane Amakhansela kanye nezisebenzi ngenhloso yokuqhamuka namaqhingasu okutakula uMkhandlu
AKUSIYONA imfihlo ukuthi uMasipala awenzi kahle. Empilweni okusemqoka ukuqala uvume ukuthi awenzanga kahle ukuze uzokwazi ukuthola izixazululo zalapho ophazame khona. Nakulolu daba ubuholi baseMsunduzi buyazibona ukuthi abenzi kahle. Sebunqume ukuhlangana basebenzisane ukuze bathole izisombululo ezinkingeni ezibukhungethe.
IBamba Meneja yoMkhandlu uNkk uNelisiwe Ngcobo ephakathi kobuholi baseMsunduzi lithe njengeHhovisi lalo banqume ukuthi bameme inhlangano iCity’s Network. Ubuholi boMsunduzi bungamalungu eCity’s Network, buphinde busebenze ngokubambisana ukuze bathole imibono eyahlukahlukene engalekelela ekutheni batakule uMsunduzi. “Njengoba sesiphakathi nesabelomali sonyaka wezi2019/20 ngalo mhlangano sihlose ukuthola izindlela ezizokwenza ukuthi senze okwehlukile kunalokhu esasikwenzile siqala lesi sabelomali. ICity’s Network yiyo ezosilekelela ekutheni siqhamuke namasu amasha siphinde sithathe izinqumo ezimqoka ezizokwakha lo Masipala,” kusho iMeneja.
Oyisikhulu seCity’s Network uMnu uSithole Mbanga uqale ngokulandisa ukuthi uMsunduzi uyingxenye noma ungamalungu eCity’s Network ngoba ungomunye boMasipala abayisi-9 abokuqala ngesikhathi kuthulwa uhlelo loHulumeni Basekhaya, nokwenza ube ngomunye boMasipala okungamele bangenzi kahle ezweni. “Isizathu esenza sibe seMsunduzi kungoba uMsunduzi kanye neMangaung bayahluleka ukwenza okulindeleke kubo. Sinqume ukuthi sifike nendlela eyehlukile ezolekelela ekutheni kufikwe nezixazululo, leyo ndlela eyokuthi izinto zenziwe zibonakale njengasenkulisa kunokuthi kusetshenziswe iPower Point nokuyiyo eyejwayelekile,” kusho uMnu uMbanga.
Ukuhlukanisa uMasipala izigamu iyona ndlela eyenza kube lula ukuwulawula. Nakulo mhlangano kunxuswe izikhulu zama-Unit ngokuhlukana kwawo ukuba zethule izingqinamba ezibhekene nazo, nokuthi yikuphi ezibona ukuthi kungaba izixazululo zalezo zinkinga. Obekuhlukile kulokhu ukuthi esinye isikhulu senye i-Unit besikwazi ukuthi sifake uvo lwaso ukuthi yikuphi ababona kungalekelela kuleyo Unit ekutheni yenze kahle.
Izinsizakalo zomphakathi
Isikhulu se-Unit yeZinsizakalo Zomphakathi uMnu uMbangeni Mathe uchaze i-Unit njengokuyiyo abayibuka njengehambisa noma elekelela ngezinsizakalo emphakathini, “Lokho ngikushiswo ukuthi yithina esibhekelela ukuqoqwa kwemfucuza emphakathini, ukulawula isiminyaminya emgwaqweni, kanye nokunqunywa kukatshani,” kulanda uMnu uMathe. Ubekha phezulu, okunye okwenziwa ile Unit ukucisha imililo, ukuqapha nokulawula izinhlekelele ezenzeke emphakathini, amathuna kanye nokulungisa amapaki.
Uveze ukuthi ngokubambisana neUnit yeZokuqasha sebekwazile ukuqasha amaphoyisa omgwaqo angama-25 ezinyangeni eziyisi-6 ezedlule. “Phezu kwalokho sikwazile ukusebenzisana noMnyango Wezokuthutha kuzwelonke ekutheni senze izivimbamgwaqo eziningi ngenhloso yokuzama ukunqanda ukwenyuka kwesibalo sezingozi ezibakhona ngesikhathi sikaNcibijane,” kulanda uMathe, eseka isizathu esenze ukuthi kwengezwe amaphoyisa omgwaqo.
UMathe ukubeke obala ukuthi inkinga enkulu ababhekene nayo njenge-Unit ukuhluleka ukuhlanza idolobha. Udalule ukuthi okwamanje imfucuza kumele ilandwe ezindaweni ezili-18 ngosuku, okubala idolobha kanye nasemalokishini ahlukahlukene. “Izindawo zakwaVulindlela kanye nalezi abahlala ngokungemvume azilandelwa imfucuza nokudala ukuthi kube nezindawo eziningi zokulahla imfucuza ezingekho emthethweni,” kusho uMathe.
Okuvelile njengesixazululo ukuthi kudingeka amaloli ama-3 kanye nodombo ababili ukuze ukuqoqwa kwemfucuza kubuyele esimweni esejwayelekile. Okunye okutholakele ukuthi kucazwe idolobha izigamu ezingama-29 ukuze kubonakale ukuthi ngobani abangasebenzi, futhi kutholakale ukuthi abangenzi kahle bangalekelelwa kanjani. UMnu uMathe ukuvezile ukuthi lokhu bazokwenza ngokubambisana nazisebenzi ze-EWP. “Ukushanela ngezandla kusidla isikhathi kanti siyabona ukuthi umonakalo usumkhulu, manje sesidinga imishini ezokwenza kushanelwe ngesivinini. Siyazi ukusetshenziswa kwemishini kubantu abaqashelwe ukusebenza ngezandla kuyinkinga, futhi kungadala uthuthuva phakathi komqashi kanye nezinyunyana, sesinqume ukuthi sixoxisane nezinyunyana ngenhloso yokuthi sithole isisombululo esizolekelela uMkhandlu ukuthi uye phambili. Izisebenzi zizothola nokufundiseka ukuthi umshini usebenza kanjani,” kuchaza uMathe.
Okunye okuvelile njengezixazululo kule Unit ukuthi kufundiswe amalungu omphakathi ngokubungozi bokulahla noma yikuphi imfucuza, baphinde banxuswe ukuthi okungenani abadle ngoludala bakhe imigodi yezibi kwezinye izindawo.
Kusemqoka ukuthi amalungu omphakathi ahambele amapaki. UMnu uMathe wethule ukuthi kumele balethele abantu amaskrini khona bezoba nakho okubayisa emapaki ngoba okwamanje ayikho into enxenxa amalungu omphakathi ukuthi ahambele lezi zindawo zomphakathi. Uqhube ngokuthi i-Unit yakhe kumele yakhe indawo ehloniphekile yokuhlala abaqaphi bezindawo abaziqaphile. “Kumele sikhombise ukuthi siyawahlonipha amaqhawe ethu. Angisithandi isimo sendlu kanogada, okunguye oqaphe ithuna likababa uMoses Mabhida, njenge-Unit kumele kubonakale ukuthi siyabahlonipha.”
Waqhuba ngokuthi beyi-Unit sebenqume ukuthola olunye uhlobo abazolisebenzisa olungeke luhehe izigebengu ukuba zidayise izimpahla zokubiya. Ubesho lokhu kulandela ukwebiwa kwezimpahla zokubiyela amathuna kanye nezakhiwo zikaMasipala. Uphethe ngokuthi; “Sikubonile ukuthi okudala idolobha linuke ukuthi izindlu zokuzikhulula kungoba aziziningi edolobheni. Sikubona kumqoka ukuthi kwakhiwe izindlu zangasese.”
UMnu uFelix Nxumalo oyisikhulu seUnit yeZokuthuthuka Okusimemeyo kanye Nezindawomqoka Zedolobha ushayele uMnu uMathe ihlombe ngokufika nale micabango, “Engifisa ukuthi sikuqaphele ukuthi imali asinayo, ngoba uma ngibheka izinto eziningi ozethulile zidinga imali. Uluphi uhlelo onalo ukuze wenze lezi zinto zenzeke phezu kwalezi zinkinga?” kubuza ngenhloso yokufisa ukuthola iqhingasu likaMnu uMathe. UMathe ukubeke kwacaca ukuthi usezimisele ngokusebenzisana namabhizinisi ngoba nawo ayathinteka kulezi zingqinamba idolobha elibhekene nazo.
IHhovisi leMeneja yedolobha
Ihhovisi leMeneja yilona Hhovisi cishe eliqatha indima enkulu okuwadlula wonke ngoba zonke izinto ezithinta ukusebenza kukaMasipala kudlula kulona ngaphambi kokuthi udaba ludlulele kuleyo Unit ethintekayo. UNkk uMedelien Jackson nguye ebemele leli Hhovisi ethula ukuthi lenzani futhi yiziphi izingqinamba elibhekene nazo ekutheni lisebenze kahle.
UNkk uMedelien eqala ukuthula amaSub-Unit aleli Hhovisi, uchaze eyoCwaningomabhuku Lwangaphakathi njengesemqoka kakhulu ngoba iyona ebalawulayo ukuthi banganhlanhlathi futhi benze izinto ngomthetho. “Ngaso sonke isikhathi sidlula kule Unit ngoba iyakwazi ukusheshe isibonise uma sizoshayisa, ngakho sisebenzisa yona njengomlawuli waleli Hhovisi,” kuchaza uMedeliene.
“Inkinga esibhekene nayo njengeHhovisi ukungasabalalisi ngendlela ibhokisi lapho okumele izakhamuzi zisiphe uvo lwazo ukuthi ikuphi lapho okumele sithuthukise khona futhi senze kanjani. Lokho ngikusho ngoba izakhamuzi zaseMsunduzi siyazihlonipha futhi siyazi ukuthi zihlakaniphe kangakani,” kuchaza uNkk uJackson ethula ezinye zezinkinga ababhekene nazo.
Uqhube ngokungena odabeni lweCall Centre nokuyinkinga cishe izakhamuzi eziningi ezikhala ngakho, phakathi kwezinto okukhalwa ngazo ukungabanjwa kwezincingo, yizisebenzi ezingabahloniphi abantu ocingweni. UMedelien ube esenxusa isikhulu se-Unit yeZinsizakalo Ngokwengqalasizinda uMnu uBranden Sivpasard ukuthi abafonele njengesakhamuzi esidinga usizo. Akutholakalangake lokhu obekulindelekile njengokuthi zingalubambi ucingo, zidelele ocingweni. Okuthulwe uMadelien ukuthi izisebenzi zaseCall Centre azisebenzi ngaphansi kwesimo esilungile ngenxa yesimo sehhovisi lazo. “Esikutholile