UKUSUKA EJELE KUYA ESIHLALWENI SOBUMENGAMELI: UMANDELA WAYIKHOMBA INDLELA, UMSUNDUZI UYAYILANDELA U
MLANDO kaNelson Mandela nowaMaphakathi neKwaZuluNatal izithupha ziya ogwayini. Mhla zizi-5 kuNcwaba ngowe-1962 eHowick, indawo engama-32km enyakatho ntshonalanga noMgungundlovu uMandela waboshwa yithimba elaliholwa nguSayitsheni uForster wamaphoyisa aseMgungundlovu. Lokhu kwakuyisiqalo sokuvalelwa kwakhe iminyaka engama-27, umlando wethu ugutshuzelwe yifu elimnyama.
Eminyakeni engama-30 eyedlule mhla zili-11 kuNhlolanja ngowe-1990 ilanga lansasa phezu kweNingizimu Afrika ekugcineni. Uhlelo olwaluchazwe yiUnited Nations njengobelelesi kubantu lwaphahlazeka. Ekugcineni uHulumeni wobandlululo wadedela ejele umuntu owaba ngubaba wesizwe, ongasekho uMengameli uNelson Mandela.
Abantu baseNingizimu Afrika, yize behlukahlukene nangamasiko, bonke bafunde lukhulu kuNelson Mandela.
Isifundo esikhulu yileso sokubekezela. Yize aba sejele iminyaka eminingi, wabekezela wangalahlekelwa wumkhondo walokho ayefuna ukukuthola. Lokhu yinto okufanele isizwe sonke siyijabulele, sazi ukuthi noma kunaziphi izingqinamba ekwakhiweni kwesizwe, ukubekezela kuyoholela empumelelweni.
Esinye esisifunde kuMandela, ukubaluleka kokubuyisana kwezizwe ngenhloso yentuthuko ngenqubekelaphambili. Wenza sonke sabona ukuthi uma sibhekana nezingqinamba siyimbumba siba namandla emizamweni yethu ngemibono ngesizwe sethu. Kubaluleke kakhulu namhlanje ukuthi nxashana sakha iNingizimu Afrika enempumelelo, sidinga sonke siphose esivivaneni siyimbumba.
NjengoMasipala uMsunduzi, sizibophezele endleleni yokwenza kaMandela nezimfundiso zakhe ngokuzwana ngokwnhlalo nobuholi obuzwelayo.