UMsunduzi nomkhankaso wokukhuculula idolobha
UMASIPALA uMsunduzi ususukumele ukulungisa isimo sedolobha uMgungundlovu ngokuqala umkhankaso wokuqoqa ubufakazi nokuthola izinto ezingalungile ezenzeka ezakhiweni ezikuleli dolobheni.
Abophiko lweZinsizakalo Zomphakathi noloKuthuthuka Okusimemeyo kanye Nezindawomqoka Zedolobha bahamba phambili kulo mkhankaso oqale emgwaqeni uPietermaritz ophakathi kukaWest noPine okuyindawo esidume ngokuthi iseSomalia.
UMnu uMduduzi Mbokazi onguMeluleki ophikweni lwezoMthetho uthe: “Esikwenzayo akusikho ukudiliza izakhiwo okwamanje kepha ukuqoqa ubufakazi esizobethula enkantolo ngezakhiwo esizozithola ziphambene nomthetho wedolobha, okungaze kuholele ekutheni ezinye zazo zibhidlizwe. Akugxiliwe ezakhiweni kuphela kepha kubhekwa nokuthi imithetho kaMasipala iyahlonishwa yini.”
Uthe kukhona abahweba ezindaweni zokuhlala abantu, kwezinye isibalo sabahlala kuzona siphezulu okuwukuphambana nomthetho.
Isisindo salo mkhankaso besibonakala ngokuthi zonke izinhlaka zikaMasipala ezithintekayo kuwo bezifuna ukubamba iqhaza zenze umsebenzi wazo.
Bekukhona amaphoyisa omgwaqo, abezempilo, ababhalisa amabhizinisi, abezicishamlilo nabezokuqapha.
Ngesikhathi salo mkhankaso amaphoyisa angaphansi kophiko lweZinsizakalo Zomphakathi, athole izimoto ezingekho esimweni sokuba semgwaqeni.
UMnu uBheki Xulu oyiphoyisa lomgwaqo uthe: “Sithathe izimoto ezintathu ebezingekho esimweni ngenxa yezizathu ezahlukene, abashayeli bezinye banikwe amathikithi ngenxa yokuthi kukhona okuthize obekungalungile ezimotweni zabo.”
Kushaqwe ugwayi okungavumelekile ukuthi udayiswe. Kuphinde kwaboshwa abokufika abangenawo amaphepha abagunyaza ukuthi babe kuleli zwe kwaphinde kwabonakala izakhiwo ezingekho emthethweni.
Ezinye kutholakale ukuthi azisekho esimweni esihambisana nemininingwane eyayihanjiswe kwaMasipala yavunywa, seziphendulwe amagumbi okulala aqashiswayo.
OwayenguMlawuli woMkhandlu, uMnu uSbusiso Sithole, obeyingxenye yalo mkhankaso, wathi okungahambisani nomthetho okuhlonziwe kodwa ingekho indlela yokukulungisa ngaleso sikhathi kumele kulungiswe kungalindwa ukuthi kuze kuyiwe enkantolo.
“Ingalo yomthetho iyingxenye yalo mkhankaso ngakho-ke asikwazi ukuthi silinde inkantolo kube kubonakala ukuthi kunezinto okumele ngabe azenzeki njengokudayiswa kukagwayi ongekho ethethweni,” kusho uSithole.
Uchaze lolu hlelo njengengxenye yokuhlanza idolobha nokuqinisekisa ukuthi umthetho uyalandelwa.
Uthe: “Okwenzekayo kuyingxenye yokulekelela uMsunduzi ekutheni ubuyele esimweni obuyiso nesithokozisayo. Lolu hlelo lokukhucululwa kwedolobha lesekwa nangabaholi bepolitiki okuyiMeya nesigungu esiphezulu. Inhloso ukuqinisekisa ukuthi konke okusedolobheni kunakekelwa ngendlela, okungangokuba kumele kuthokoze ngisho izakhamuzi zaseMsunduzi.”
Wathi banohlelo abalusebenzisayo lokusebenza yingakho bekhethe ukuthi idolobha balihlukanise ngezigaba ukuze kubelula ukuqhuba lo mkhankaso.
“Siqale emgwaqeni kuPietermaritz ngoba sibone kuyiwo osewonakele kakhulu, siya nasezindaweni eziphakathi edolobheni njengeTheatre Lane ngoba kunabantu abaningi abahweba kuleziya zindawo abangayihloniphi imithetho kaMasipala ezihanjelwa kakhulu yizivakashi zifunda ngomlando waleli dolobha,” kusho uSithole.
Waqhuba wathi, abakutholile ukuthi abantu babeka impilo yabo engcupheni ngokungayihloniphi imililo, ukuzixhumela ugesi namanzi okudala ukuthi uMasipala ungenzi kahle ekuqoqeni imali kuzakhamuzi.
Uthe lokhu kugcina sekudala ukuthi uMasipala ubenekinga ukuhlinzeka umphakathi ngezidingo nentuthuko ngoba ukuze ukwazi ukwenza lokhu usebenzisa imali yona le ayikoleka kuzakhamuzi.
“Isimo sendawo iSomalia ngisibona sinomthelela omkhulu ekutheni uMasipala ungenzi kahle njengoba sesibone izindawo eziqashisayo kodwa ezingawukhokheli ugesi. Kuyasijabulisa ukuthi kule ndawo kukhona asebekhala ngokungabi nawo ugesi ngoba uvalwe uMasipala okukhombisa ukuthi akusekhona kwamachanca nezakhamuzi sezizoqala zihloniphe ukusebenza koMkhandlu,” kubeka uSithole.
Wathi iminyango kaHulumeni ngeke ikwazi ukusebenza ngayodwana kumele yazi ukuthi iyadingana. Ukusho lokhu encoma ukungenelela kwengalo yomthetho kulo mkhankaso.
“Kuyakhombisa ukuthi sesiyakuqonda ukusebenza ngokubambisana siyizisebenzi zikaHulumeni ukuze esikwenzayo kuzobonakala, ikakhulukazi ezimweni ezibucayi,” usho kanje.
Waphetha ngokuthi izakhiwo ezingekho esimweni zinomthelela omkhulu ekwehleni kwentengo yezindlu ezikule ndawo.
“Indlela esebebiye ngayo ayisakhombisi kulidolobha sekungathi ngenye indawo ongayazi okungadala ukuthi ofuna ukudayisa indlu igcine isibiza imali encane ngenxa yokuthi eziseduze kazikho esimweni esihehayo futhi nabahamba ngezinyawo bayahlumezeka ngenxa yenhlalo,” kuphetha uSithole.