Ziqoqwa nakuHulumeni izikweletu eMsunduzi
KUNYAKAZE uMsunduzi wonke ngesikhathi uMasipala uvalela isikole samabanga aphakeme, iGeorgetown, amanzi isikhathi esingangenyanga ngenxa yesikweletu samanzi.
Lesi sikole sikweleta uMasipala izigidi ezi-R2 ngamanzi kanti uHulumeni uwukweleta imali elinganiselwa ezigidini ezili-R196.
Ngokusho kweMeya uMzimkhulu Thebolla, lesi sikole savalelwa amanzi ngoZibandlela nyakenye ukuze abaphathi baso bezokwenza okuthile izikole zingakavulwa ngoMasingana nonyaka.
“Imfundo eMsunduzi siyayihlonipha kakhulu futhi ingezinye zezinto esaziyo ukuthi ziwumgogodla wentuthuko yedolobha lethu. Nathi njengoMasipala kumele sihlinzeke ngezidingo ezingeke ziphazanyiswe yinoma ngubani. Bekumele sivale amanzi eGeorgetown ngoZibandlela futhi besingaqali njengoba sakwenza nangonyaka wezi-2018.”
IMeya iveze ukuthi lesi sikole sagcina ngoMbasa wezi-2018 ukukhokhela amanzi nakhona sasilekelelwa wuMnyango Wezimali esifundazweni.
“IGeorgetown ingesinye sezikole esingena ngaphansi kukaSection 21, okuyizikole okumele zizikhokhele. Kunezinye ezili-10 ezikweleta uMasipala kanti abaphathi bazo sebefikile bazoxoxisana nathi ukuthi bazosikhokha kanjani isikweletu sabo,” kusho iMeya.
Lesi sikole sivulelwe amanzi mhla zingama-23 kuMasingana.
IMeya ithe: “Lesi sikole sivulelwe amanzi ngenxa yokuthi uMnyango Wezemfundo ukhokhele uMasipala, asilwenzanga ufefe. Uma sihlanganisa imali esiyikweletwa uHulumeni siwuMasipala ifinyelela ezigidini ezii-R196 lokho kukhombisa ngokusobala ukuthi ngeke sikwazi ukuhlinzeka umphakathi ngezinsiza uma singeke sikhokhelwe imali ngoba sidinga yona ukuze sihlinzeke umphakathi ngezidingo,” kusho iMeya.
UMnu uSifiso Khoza wophiko lwezimali, emhlanganweni wamakhansela uveze ukuthi emalini engangezigidi ezi-R3 ekweletwa uMasipala, amanzi ahamba phambili ngamaphesenti angama-30 bese kulandela isikweletu samareythi.
Echaza ukuthi yini abayithole njengesizathu esenza sibe phezulu kangaka isikweletu samanzi, uthe: “Izakhamuzi zinamapayipi avuzayo emzini yazo bese zingabaqashi abantu abakwazi ukuwavala ngoba zithi imali azinayo. Sike saya elokishini iMbali lapho esithole khona lokhu. Uma sekugxaza amanzi bavele benze umsele amanzi bawachilizele emgwaqweni.
Okunye wukuthi kunabantu abahlwempu kodwa abangabhalisile okulimaza uMasipala ngoba uma uhlwempu uHulumeni uzokukhokhela.”
Unxuse amakhansela ukuthi aklame indima yawo ngoba ayawazi amalungu omphakathi ahlwempu, ngokuthi abheke ukuthi babhalisile yini, uma bengabhalisile babalekelele ukuthi babhaliswe kulolu hlu.
UMnu uKhoza uthe sengathi basasilele kakhulu kungqalasizinda ngoba kumele abantu abahlwempu bathole imitha elibanikeza amanzi amahhala okuthi uma bewasebenzise kwadlula esikalini ababekelwe sona, avaleke ngoba kuzobe kungasiwona abenza ngawo ibhizinisi kodwa awokuphila nomndeni.
“Umuzi onamalungu omndeni ayisi-7 ungakwazi ukuqeda inyanga ngamanzi angamalitha ayizi-6 000 ngoba bayageza, bayadla, bayawasha kanti abanalo ibhizinisi lokuhlanza izimoto ngoba yilo elidla kakhulu amanzi,” kuphawula uKhoza.
Kwabekwa uHulumeni ukuthi umuzi nomuzi uthola amanzi amahhala angamalitha ayizi-6000 uma umuzi weqa lelo nani ube usuwakhokhela owasebenzisile.
UKhoza uthe amanzi amahhala maningi kakhulu ngoba ngisho labo abazikhokhelayo kuyenzeka bangawaqedi kwalawo amahhala, abakwenzi lokho ngoba becindezela labo abahlwempu.
Isikhulu ophikweni lwengqalasizinda, uMnu uBrendon Sivparsad sithe: “Sesisifakile isicelo sokuthi labo abasohlwini lwabantu abahlwempu kube impoqo ukuthi basebenzise ugesi wesigubhu khona bezozikalela bona ukuthi bawusebenzisa kanjani futhi bezobona ukuthi kumele bonge.
Okunye esikufakele isicelo wukuthi bafakelwe imitha elisebenza ngokuthi uma seweqe isikalo samanzi amahhala bese eyavaleka,” kusho uSivpasard.