Msunduzi News
NGESIKHATHI kumenyezelwa ukuthi sekutholakele umuntu wokuqala onegciwane iCorona kwaba nokwethuka. Okwaba yisimanga wukulumbana koMsunduzi nalesi simemezelo. Umuntu wokuqala owatholwa enalesi sifo wakhonjwa eMgungundlovu. Isimemezelo sakhishwa yisakhamuzi saseMsunduzi nesinguNgqongqoshwe Wezempilo kuleli uDkt uZwelini Mkhize.
Ngokombiko kaDkt uMkhize isiguli sabuya kuleli mhla lulunye kuNdasa ngowezi-2020, sihamba nabanye abayisi-8. Bonke babesuka eMilan, e-Italy. Bafikela esikhumulweni i-OR Tambo, abanye basala lapho abanye badlulela esikhumulweni iKing Shaka base bephelela eHilton eMgungundlovu. Isiguli sadluliselwa esibhedlela iGrey. Sekungumlando ukuthi isiguli lesi sesalulama.
Nokho lokho akuwuvimbanga lo mkhuhlane ukuba ubikwe nakwezinye izifundazwe nokwenza uMengameli wezwe mhla zingama-23 kuNdasa amemezele izinhlelo ezinqala zokunqanda ukubhebhetheka kwesifo. UMasipala uMsunduzi ngokusebenzisana noHulumeni omkhulu nawo wabamba iqhaza kulokhu.
Ikhuluma naleli phephandaba iMeya uMzimkhulu Thebolla ithe njengoMasipala bami noMengameli ekuqinisekiseni ukuthi lo mkhuhlane awusabalali. “Asikho ngisho isidingo sokuthi sicabange kabili kulokhu. NjengoMasipala siyabuqonda ubungozi esibhekene nabo njengezwe uma ngabe lo mkhuhlane ungasabalala,” kusho iMeya.
Iqhube ngokuthi kuzomele kwenziwe isiqiniseko sokuthi izinsiza ziyafinyelela emphakathini, “Okumqoka wukuthi siphinde sivikele abasebenzi bethu singabeki izimpilo zabo engcupheni yokuthi bazithole sebehaqwa yileligciwane,” kusho yona. Ibe isinxusa izakhamuzi ukuthi zehlise amaphaphu, khona kungeke kube nokuxhamazela nakulabo abasebenzayo ikakhulukazi kulabo abasebenza ngomphakathi.
Okunye okuvele emhlanganweni woMkhandlu ngalolu daba wukuthi izindawo zomphakathi ezilawulwa uMaspala, njengamahholo ngeke zivuleleke emphakathini ngalesi sikhathi esiyizinsuku ezingama-21 kuthi nalabo abebesebefake izicelo zokusebenzisa lezi zindawo izimvume zizohoxiswa, amapaki kanye nezindawo zokubhukuda zizovalwa. Kuvele nokuthi abasebenzi boPhiko i-Occupational Health bazohambela amarenki kanye namakhaya abadala ukuba bahlinzeke ngezibulalimagciwane, kuphindwe kuqeqeshwe namakhansela khona ezoqhubezela lolu lwazi emphakathini.
Osabambe njengeMeneja kaMasipala, uNkk uNelisiwe Ngcobo uthe usethinte uMnyango Wezezimali ekutheni ubanike imvume yokuthi basebenzise imali ukuthenga lokho obekungekho kusabelomali ukuze bazame ukulwa naleli gciwane. Ngakolunye uhlangothi uMlawuli uMnu uScelo Duma ephawula ngokuhlehliswa kwemcimbi uthe yize zimqoka izimbizo kepha ikhona enye indlela engasetshenziswa nevumelekile emthethweni olawula oMasipala nokuwukusebenzisa amaphephandaba.
Isikhulu seHhovisi leMeneja uNks uMedelien Jackson wenze izethulo esigungwini ngalokho okuzokwenziwa ukuzama ukunqanda ukubhebhetheka kwaleli ngciwane. “Njengoba uMengameli ethe akumele kuhlangane abantu badlule e-100 sizohlehlisa imicimbi ebesesiyihlelile, ngenhloso yokuxhumana nomphakathi, siphinde sigweme imihlangano yoMkhandlu ngoba uba nabantu abangaphezu kwe-100 uma sekuhlangene amakhansela, izisebenzi kanye nabezindaba.” kusho uNks uJackson.