UMsunduzi awusalanga enkulumeni yesifundazwe
NJENGAMINYAKA yonke nakulokhu kwabe kusindwe ngobethole. Kugqame imibalabala, ingqephu idla lubi. Lona umsebenzi wezinsuku ezimbili ekhalendeni lokusebenza kweSishayamthetho saKwaZuluNatal. Ngosuku lokuqala kuba wusuku olwenganyelwe yiSishayamthetho nayilapho Ongangezwe Lakhe ethula inkulumo yakhe nedle ngezaluleko kuwo wonke amalungu nomphakathi jikelele. Bese kuthi ngosuku olulandelayo amehlo athi njo kuHulumeni wesifundazwe noholwa nguNdunankulu uSihle Zikalala.
Lapha okusuke kumqoka yinkulumo yakhe uNdunankulu asuke eyibhekise kubantu baKwaZulu-Natal. Le nkulumo esambiko ibikezela nalokho okuzokwenziwa ngonyaka lo osuke uqala. Naku lokhu kube njalo, lapho uNdunakulu uZikalala ethule inkulumo yakhe, wabika ngokuningi wabuye wakhipha okuningi emgodleni walokho okuzokwenzeka.
Ezintweni eziningi azithintile uKhuzeni (abakwaZikalala) ngesimo sesifundazwe uke wagxila nangalokho okuqhubeka eNhlokodolobha, uMsunduzi. Phakathi kwakhulume ngakho kube yizinhlelo zokwandiswa kwesikhumulo sezindiza i-Orib ngenhloso yokuheha izindiza ezahlukene nokungase kwenze amanani afinyeleleke kuwo umuntu ngenxayokuncintisana. Uthintile naso hlelweni lokwakhiwa kwezindlu ngenhloso yokuqeda imijondolo edolobheni. Alusalanga olwemfucuza nathe uMasipala usayibambe ngezimpondo. Eyengqalasizinda edolobheni nomnotho wendawo, uNdunankulu utuse igxathu elithathwe uMsunduzi ukudiliza izakhiwo ezindala, bese kulezo zindawo kungene amabhizinisi amasha nokubuye kube nomthelela omuhle ekulondolozweni lwezinye zezakhiwo .
Ukhuluma nje uNdunankulu, bekunodaba obelungundabamlonyeni noluvele enkulumweni kaNgqongqoshe Wezezimali uMnu uTito Mboweni. Ethula isabelomali, uMboweni umemezele ukuthi uhlelo lokwakhiwa komgwaqo uMoses Mabhida noSelby Msimang luzomiswa. Kulokhu uNdunankulu umise idolo izakhamuzi zaseEdendale, eMbali kanye naseElandskop ukuthi yize kube nalesi simemezelo kuzwelonke, uHulumeni wesifundazwe uzongenelela.
Abantu bathi…
UMsunduzi News ukhulume nabashayeli ngalolu daba ikakhulukazi nangalokho okushiwo nguNdunankulu. UMnu uThami Vilakazi uthe; “Kungijabulisile okushiwo uNdunankulu ngoba besesethukile ukuthi kuzoba nesiminyaminya kuze kube inini, njengoba kuguqulwa imigwaqo. Uma kusekuseni, kwenziwa emibili ebheke edolobheni, kanti uma sekuntambama, kwenziwa owodwa obheke edolobheni bese emibili ebheke emakhaya, nokho lelo qhingasu liyasisebenzela siyizakhamuzi.”
Omunye wabashayeli uNks uLondeka Makhathini uthe: “Thina sesijahe ukuthi uphele lo msebenzi ngoba sifika sekudlule isikhathi emsebenzini, nathi njengothisha kunesizathu esisodwa esisizwayo ukuthi ingane ifike seyidlulelwe isikhathi ngoba ibibanjwe isiminyaminya. Ngoba nale mizila eminye esiyisebenzisayo iba nezingozi, futhi sebembondelana kuyona ukugwema lo mzima owakhiwayo. Okunye okudalwa yilo mgwaqo ukugcwala kothuli, njengoba kwakhiwa, akukwazi nokuthi kuvulwe amawindi esikoleni iGateway Christian School ngoba izingane zihogela uthuli. Inkulumo kaNdunankulu iyasithokozisa ngoba bese sithi sisele dengwane.”
Abanye bakhulume ngenkulumo nje jikelele. UNks uNokubonga Malinga uthe yena okumhlabe umxhwele uhlelo uHulumeni aqhamuka nalo lokuzama ukudala amathuba omsebenzi, ikakhulukazi njengoba esemncane futhi osadinga umsebenzi.
“Lokhu ngiyakubona ukuthi kuliqiniso ngoba nami ngingomunye walabo abathole i-internship eyaqhumuka noMnyango Wezokubusa Ngokubambisana Nezindaba ZoMdabu. Ngisho lokhu ngoba uMhlonishwa uSipho Hlomuka washo ukuthi inhloso yalolu hlelo ngukuthi izifundiswa zingahlali ekhaya namajazi azo,” kusho uNokubonga.
UMnu uSipho Ziqubu uthe inkulumo kaNdunankulu uyayemukela ngoba ithinte nosomabhizinisi abancane, nokuthi banazo izinhlelo ezizothuthukisa intsha yakulesi sifundazwe. UMnu uZiqubu uthe; “Ngithe ake ngizolalela ngoba ngingumuntu ongusimabhizinisi osafufusa futhi ngisahamba ngingena iminyango ukuzama ukuthola usizo, ngakhoke uma ngizwa ukuthi uHulumeni wethu uyakwazi ukuxhasa osomabhizinisi kuze kufinyelele ezigidini nami ngifikelwa ithemba ukuthi angingqongqoze uMnyangweni kaHulumeni.”
UMnu uSimphiwe Makhanya uthe yena akuzwile kuthintwa uNdunankulu ilokho kweWi-Fi, “Lolu daba mina ngibona singangalunaka kanti lubalulekile, isizathu ukuthi sichitha imali eningi sithenga idatha, kanti kwaleyo mali asinayo. Iqiniso ngukuthi sithenga idatha ngoba sifuna ukuxhumana nabantu, abafundayo basebenzisa yona ukwenza imisebenzi yesikole. Kuyasijabulisa ukuthi uHulumeni lokho uyakubona, njengoba ethembise nokuthi izofakwa nasezindaweni zasemakhaya, siyalubona lolu hlelo luzoba olwabantu.”
UNks uNokuthula Khanyile uthe uzwile uNdunankulu ekhuluma ngezokuvasha kodwa akazwanga ekhuluma ngoMsunduzi kulolu daba ikakhulukazi ngoba iyiNhlokodolobha. “Ngikusho lokhu ngoba lapha eMsunduzi kuthiwa sinezindawo zokuvasha ezinomlando kodwa azivuselelwa, lokhu kwenza sibone ukuthi uma unentshisekelo emkhakheni wezokuvasha uhlala eMsunduzi ngathi uyasalelela,” kusho umaNgwane.