Uguquko ezimbizweni zokuthathisela
ICoronavirus iphazamise nohlelo lwaminyaka yonke lokubika nokuthathisela kubantu
KUKHONA ukuvumelana kongoti ukuthi uHulumeni owenzakahle yilowo osebenza bese ubuye uthathisele kubavoti. Lokhu kwenza umphakathi abelusi bokusebenza kukaHulumeni wawo. Njengaminyaka yonke uMsunduzi ubunezinhlelo zokuyothathisela emphakathini ngaphansi kohlelo lwentuthuko edindiyelwe ( Integrated Development Plan). Lokhu bekuzokwenzeka ngoMbasa futhi kungokokuqala ngaphansi koholo lweMeya uThebolla. Zonke izinhlelo bese zimi ngomumo kwase kuhlupha umkhuhlane iCOVID-19 nophoqe ukuba izwe lime nse izinsuku ezingama-21 njengomlayelo kaMengameli uRamaphosa.
Ngesikhathi sokuthathisela emphakathini kuba nezithangami ezibizwa ngezimbizo nezihanjelwa ngamalungu omphakathi, iziphathimandla namakhansela . Lapha kusuke kulandelwa umthetho olawula ukusebenza koMasipala, iMunicipal Systems Act iShahluko 5, 28 (2). Lapha umasipala uyelulekwa ukuba uxhumane nomphakathi ngaphambi kokuthi uphasise uhlelo lwentuthuko edidiyelwe. UMsunduzi unamawadi angama-39, ngakho ukuze kube lula ukuwusebenza uhlukaniswa izigaba ezinhlanu lapho osuke usubizwa ngamazone. La mazone kusuke kuyiCentral lapho kukhona amawadi akhele idolobha kanye nedolobha imbala, kube yiNothern Area lapho kusuke kungamawadi aseNorthdale, kube i-Edendale lapho kusuke kungamawadi akhele i-Edendale ehlanganiswe, kube iMbali nakhona asuke ehlangene bese kuba iVulindlela lapho kusuke kuhlangene amawadi asezindaweni zaMakhosi. Izimbizo zizoba kulezi zindawo zonhlanu, okusho ukuthi wonke amawadi azolithola ithuba lokuthi abe nezethulo kuMeya.
Ukwethulwa kwesabelomali kuzobe kungezinye zezinto ezizokwenzeka uma kuqhubeka izimbizo. Lokho kuzokwenzeka ngoba umthetho iMunicipal Finance Management iSahluko 22 (a) lapho ithi uma isabelomali siqeda kwethulwa emkhandlwini iloyo obhekelele ezezimali kumele isabelomali sethulwe nase emphakathini.
Njengoba kuphungwa umkhuhlane iCOVID-19 nje kubukeka zikhona ezinye izindlela uMkhandlu ongenza ngazo ukuqinisekisa ukuthi umphakathi uyathinteka lokhu kuhlanganisa ezokuxhumana namaphephandaba afana noMsunduzi News. Okunye amalungu ophakathi anganikwa nethuba lokwenza izethulo ezibhalwe phansi nangazithumela eMkhandlwini.