Isifiso soKaMajola ngamakhansela
Uthi ufisa ukushiya amakhansela esesebenzisana ngokuzwana ngale kwepolitiki yamaqembu
UMSEBEZNI wakhe wukuqinisekisa ukuthi ukusebenza kwamakhansela kuhlelekile nokuthi aba yibutho elilodwa uma kufikwa ekuletheni intuthuko emphakathini. Lowo nguSomlomo woMkhandlu, iKhansela u-Eunice KaMajola Zondi. Akayena umafikizolo ezikhundleni ezimqoka zomkhandlu njengoba ngonyaka wezi-2010 waqokwa njengoSihlalo we-Unit iCooperative Services. Kwathi ngonyaka wezi2011 wasuka lapho waqokwa njengoSihlalo we-Unit iSustainable Development and City Entities nashiye kuwo ngowezi-2019.
Enkulumweni ekhethekile naleli phephandaba uSomlomo uveze lokho okuyisifiso sakhe ngozakwabo eMkhandlwini. Uthi uyakuqonda ukuthi umsebenzi wakhe ngukugcina uMkhandlu usesimweni esifanele, “Lokho kuncike ekutheni mina uqobo lwami amakhansela ngiwaphatha kanjani. Anginakho yini ukuthi leli ikhansela le-ANC noma leDA ngoba uma bengaphathekile kahle kudala uqhekeko nokuklwebhana ngamazwi emhlanganweni ekumele ngabe umhlangano oya phambili futhi ogxile ekutheni kuguqule impilo yabantu.”
OKaMajola usethimbeni linye neMeya uThebolla , iSekela layo uManilal Inderjit kanye noSotswebu uVusi Ntshangase. Indima abakhonjwe ukuba bayihlakule, wukwakha ubunye ekuletheni intuthuko nozinzo kubantu baseMsunduzi. Akuyona imfihlo ukuthi uzinzo kunoma yimuphi uMkhandlu lwenzeka uma amakhansela esebenzisana futhi ehloniphana nokungasho ukuthi kumele angaphikisani.
Umehluko phakathi kukaMkhulumeli woMkhandlu noSomlomo ngukuthi uMkhulumeli ukhipha izindaba zangaphakathi azimukezele emphakathini, kanti uSomlomo ngusihlalo woMkhandlu, usebenza ngamakhansela ukuthi intuthuko ayimukezela kanjani kubantu, aphinde abuke umsebenzi wamakhansela ukuthi asebenza ngendlela okuyiyo yini ngoba balawulwa imithetho ekumele basebenze ngaphansi kwayo. “NjengoSomlomo uma ngibona ukuthi kukhona ikhansela elingakwenzi kahle okwami ngukumbiza ngizwe ukuthi yiziphi izingqinamba ezenza angasebenzi ngendlela noma ngokulindelekile, bese ngibona ukuthi singamulekelela kanjani.
Uma sibona ukuthi ikhansela elingenzanga kahle futhi iHhovisi lami elithatha izinyathelo zokuqondisa ubugwegwe kulelo khansela, ngilawulwa ngumthetho,” kuchaza uKaMajola. Uqhube wathi ezinyangeni eziyisi-6 enguSomlomo akukakafiki la iHhovisi lakhe lithola izinkonondo ezivela ezakhamuzini ngokungasebenzi kahle kwekhansela. “Uma usebenza kuleli Hhovisi kumele uqaphele ngoba ngeke sikubalekele ukuthi kukhona izakhamuzi ezingalikhonzile ikhansela elakhethwa ngamalungu omphakathi, ngakhoke lelo lungu lomphakathi sike sililekelele ngelikufisayo, bese silazisa ukuthi kumele liqale ehhovisi lekhansela, ngenxa yokuthi kumele kulandelwe uhlaka lokusebenza,” kuchaza uSomlomo.
NjengoSomlomo woMkhandlu iHhovisi lakhe alibhekeleli i-African National Congress (ANC) kuphela kepha iHhovisi elisebenzisana nazo zonke izinhlangano zepolitiki ezikhona eMkhandlwini.
USomlomo uthi izingqinamba emsebenzini into eyohlezi ikhona, nakwelakhe iHhovisi uthi banazo izinkinga abahlangabezana nazo. “Ezinye zezinkinga esihlangabezana nazo ngamalungu omphakathi angathandi ukusebenzisana namakhansela, lokho okwenza kube nzima ukuthola ukuthi ikhansela alisebenzi ngempela yini noma ingenxa yabantu abasebenzisa izimpi zabo endaweni yokusebenza, okwethu ngukungakhethi bala kodwa kumele baqonde ukuthi ikhansela likhonela umphakathi.”
Uqhube ngokuthi iHhovisi likaSomlomo liyihhovisi lomphakathi, ngakhoke lihlezi ligcwele amalungu omphakathi amaWadi angama-39 okungamaWadi aseMsunduzi. UKaMajola uthe; “Ngazifundisa umkhuba wokuthi nanoma iliphi ilungu lomphakathi uma lingena eHhovisi lami kumele liphume inkinga yalo ixazululekile, ukuthi inkinga ixazululekile akusho ukuthi kumele kuphethwe ngokuthi kwenzeke lokho okufiswa ilungu lomphakathi, kepha kumele kube nobulungiswa kuleyo nkinga ebikhona.” Enza isibonelo ngalokhu uthe, kuyenzeka kufike ilungu lomphakathi elithukuthele ngoba libona sengathithi ubizwe imali eningi okumele ayikhokhe ayikhokhela ugesi, wathi ubulungiswa ukuthi athole izisebenzi zakwaMasipala zimchazele ukuthi kufike kanjani kuleli nani, hhayi ukuthi kumele aze ehliselwe isikweletu sakhe, wathi kokunye futhi kuyenzeka ukuthi ngempela izisebenzi zenze iphutha kugcine kulungisiwe; isakhamuzi sikhokhele esikusebenzisile.
Ngonyaka ozayo kuyiwa okhethweni loHulumeni Bezindawo, lokho okusho ukuthi siyaphela isikhathi sikaKaMajola njengoSomlomo, ngonyaka ozayo kuzobe sekukhethwa kabusha ubuholi. UKaMajola uthi: “Engifisa ukukuzuza uma sengiphuma ngonyaka ozayo, ukuthi ngishiye uMkhandlu uhlangene, amakhansela esebenzisana, ikhansela likwazi ukuthi uma linenkinga alizokunqikaza ukuthinta iHhovisi leMeya noma likaSomlomo ukuze lithole usizo. Siyazi ukuthi sinamaqembu ahlukahlukene kodwa ngifisa amakhansela azi ukuthi uma sesiseMkhandlwini sinesifiso esisodwa sokuzosebenzela umphakathi, okwethu ukuthi sizoba uMkhandlu owodwa onesifiso esisodwa, amakhansela akhuluma ngazwilinye lokuthi bazohlinzeka umphakathi ngentuthuko noma ngabe bayiEconomic Freedom Fighters (EFF) noma iDemocratic Alliance (DA) kepha bazi ukuthi uMkhandlu uwodwa futhi unenhloso eyodwa,” kuphetha uSomlomo.