Kuhlwanyelwa isiko lenhlanzeko ezakhamuzini
“INHLANZEKO kubantu nasendaweni akuyona into yosuku olulodwa kepha wumkhuba wansuku zonke nogcina usiyisikompilo kubantu,” lawa ngamagama ashiwo yiMeya, ikhansela uMzimkhulu Thebolla. Ukusho lokhu ngesikhathi kuqhubeka uhlelo lokuhlanza idolobha nokuyinto iHhovisi leMeya kusuka kusaphethe Ikhansela uThemba Njilo yabe iseqhulwini. Kulokhu uThebolla ubethula umlenze wezi-2020 wokukhuculula indawo nakwenzele erenki yaseMbali.
UThebolla uthe, “Sithathe isinqumo sokuthi njalo ngoLwezithathu besibili enyangeni kube nomkhankaso wokuthi kungusuku lokungalahlwa mfucuza emigwaqweni yaseMsunduzi, singagcini ngokusho kepha nathi singibuholi siphume siyosebenza emphakathini, siphinde silekelele nalabo okungumsebenzi wabo ukuhlanza imigwaqo”, kusho iMeya.
Uqhube ngokuthi okumqoka abakwenzayo ukufundisa izakhamuzi ukuthi ukuhlanza izindawo lapho abantu behlala khona akusiwona umsebenzi kaMasipala kuphela kepha umsebenzi wawo wonke umuntu ohlala kuleyo ndawo.
“Sinezisebenzi ezilinganiselwa ema-20 eziphuma oPhikweni i-Environmental Health ezizogxila ekufundiseni labo abahweba ngokudayisa emgaqweni, kanye nabasebenzisi bemigwaqo siphinde sivakashele amabhizinisi. Ngicela sibambisane nazo zonke izakhamuzi khona sizokwenza idolobha lethu libonakale ukuthi idolobha futhi lihlonipheke,” kusho iMeya.
USomlomo iKhansela u-Eunice Majola ubonge igxathu leMeya lokuthi akhiphe nosopolitiki emahhovisi, ukuthi babambe iqhaza ekuhlanzeni idolobha. “Kuyathokozisa ukuthi kunabantu abazimisele ukubamba iqhaza ekuhlanzeni idolobha. Ngokwedlule savakashelwa ngubuholi bakwaSave, manje sesiyabona iCapital City Marathon, lokhu kuyakhombisa ukuthi izinhlaka ezisemphakathini zinentshisekelo efanayo nekaMasipala,” kuncoma uKaMajola.
Uqhube ngokuthi okubaphatha kabi ngukuthi bathole izikhalo zokungcola kwedolobha kepha kungabi bikho abakwenzayo ekuhlanzeni idolobha. “Mina ngike ngithi ngesikhathi ngikhononda kodwa kumele kube khona indima engiyihlakulile ekutheni kwenzeke kahle, ngoba abanye balabo bantu abakhonondayo bayingxenye yabangcolisayo. Sike sijabule uma sithola abantu abathi bazimisele ukubamba iqhaza,” kusho uKaMajola.
Uthe kunezinguquko ezithile okumele bazenze ngokuqhubeka kwalolu hlelo kusukela kusekhona loyo obeyiMeya uNjilo, “Siyabona kunamakhansela akhona amanye awekho, kumele sigqugquzele amakhansela ukuthi abe ingxenye yalolu hlelo, uNjilo yena ubesebenza kakhulu ngalabo abasebenza ngokuzinikela, manje siyabona ukuthi kumele sithinte nosomabhizinisi babe yingxenye. Siphinde simeme kakhulu ukuze lo mkhankaso uzoba yimpumelelo.”
Uqhube ngokuthi njengoba kuneWar Room amalungu eSishayamthetho azibophezele ukuthi azobamba iqhaza ekutheni kuhlanzwe idolobha. “Ngifisa leli sasasa lingapheli kepha liqhubeke futhi libonakale kunendima eliyihlakulile ekubukekeni kweNhlokodolobha. Ukungenelela kukaHulumeni wesifundazwe kube nomthelela omkhulu.”
ObeyiMeya uNjilo uthi uyakujabulela ukubona lolu hlelo luqhubeka. “Ngaqala lolu hlelo ngowezi-2016 ngiqala ukuba yiMeya, alutholanga ukwesekwa kangako. Ngiyajabula ukuthi iMeya uThebolla usekwazi ukusebenzisana nezinhlaka engangifisa ukusebenzana nazo. Ngizoba yingxenye ngilandela uholo lweMeya ngoba kuwumjaho wokugijima kulokhu sesimukezele kuyena,” kusho uNjilo.