Imigwaqo iqinisekisa ukugeleza komnotho
UKUVULELEKA kwemigwaqo kumqoka ekuhambisesi umnotho emiphakathini. Akugcini lapho izinsiza ezimqoka zidluliswa ngayo imigwaqo njengoba izithuthi zihamba kuyo. Ngisho abezempilo bahamba kuyo le migwaqo nokumqoka ngoba uma kungaba nephutha kungasho ukulahleka komphefumulo. Imigwaqo yaseMsunduzi ingeminye evame ukuminyana ngenxa yezithuthi kanye nabantu abayisebenzisayo nokuphoqa ukuthi amaphoyisa omgwaqo asebenze ngokweqile. Ekhuluma naleli phephandaba uMnu uBheki Xulu oliphoyisa lomgwaqo elimkantshubovu uveze ezinye izindlela abazilandelayo ukulekelela kulesi simo.
UXulu uthe kuyisifiso sikaMasipala ukuthi uma usuka eScotsville uya enkabeni yedolobha kube imizuzu emi-5 noma kube eli-10 uma kukhona okuphazamisa emigwaqeni, kuthi uma usuka e-Edendale kube imizuzu engama-20, kanti uma kunenkinga kube engama-30; kanjalo noma usuka eNorthdale kumele kube imizuzu engama-20 noma engama-30 uma kunengozi. Uligcizelele elokuthi konke lokhu kungenzeka uma kunokusebenzisana phakathi kwamaphoyisa omgwaqo nalabo abasebenzisa umgwaqo ngezikhathi ezahlukene. Uphawule nangohlelo lokutshala amaphoyisa omgwaqo nathe kumele asabalale yonke indawo hhayi kuphela endaweni eyodwa njengase-Edendale ngoba kuthiwa kwakhiwa umgwaqo.
“Abukho ubuhlakani ekugxileni endaweni eyodwa, kumqoka ukuthi yonke imigwaqo yethu ivuleleke ngoba ngokwenza njalo siqinisekisa ukugeleza komnotho nokusatshalaliswa kwezinsiza eMsunduzi,” kubeka uXulu.
Uthe akubaphathi kahle ukuthi abantu bafike sesedlulile isikhathi emesebenzini ngenxa yesiminyaminya. Ube esechaza ngamahora okusebenza. “Amaphoyisa omgwaqo eMsunduzi asebenza kusukela ngehora lesi-6 ekuseni ashayise ngehora lesi-6 ntamabama. Labo abangena ekuseni bangena ngehora lesithupha ekuseni bashayise ngehora lesibili emini yantambama, kanti abantambama bangena ngehora le-11 ekuseni bashayise ngehora lesithupha”, kuchaza uXulu.
Odabeni lwezithuthi zamaphoyisa uvumile ukuthi kukhona inkinga nathe unethemba lokuthi lokhu kuzolungiswa kungekudala. Uveze nokuthi nokuthi ukuqashwa kwamaphoyisa angama-25 kwenze umehluko.
“Ukufika kwalaba basebenzi kusisize ngokuthi sesiyakwazi ukufika lapho kudingeka khona amaphoyisa ngokushesha, futhi sesiyakwazi nokutshala amaphoyisa ezimpambanweni zemigwaqo ukwenza imigwaqo yethu ikhululeke, ngoba besi namaphiyisa ambalwa, manje sesiyazibona ukuthi siyaphokophela labo esihlose ukufinyelela khona, ” kusho uXulu.