Okuhle ngesikhumulo sezindiza sendawo
Isikhumulo i-Orib kutholwe ukuthi izinga lokuphepha lisezingeni elamukelekile
KWEJWAYELEKILE ukuthi abantu bacabange ukuthi ezokuphepha kulezi zikhumulo zezindiza ezincane aziqinile njengalezo ezinkulu ezifana neKing Shaka kanye ne-OR Tambo. Lo mcabango awulona iqiniso futhi uMasipala uMsunduzi ukutshengisile lokho. Inhlangano eyengamele izindiza kuleli iCivil Aviation Authority (CAA) iqinisekisile ukuthi izinga lokuphepha kwesikhumulo sezindiza i-Orib lisezingeni elifanale. Le nhlangano nebika ukusebenza kwayo eMnyangweni Wezokuthutha iyo ebeka imigomo ukuthi isikhumulo sisebenze nokuthi sigcinwe kanjani ukuze sibe ngesiphephile kubagibeli kanye nasemphakathini jikelele .
Obambe njengeSikhulu Esiphezulu sesikhumulo i-Orib, uMnu uMazwi Mngwengwe uthe okumqoka kubo njengoMasipala ukuqinisekisa ukuthi umphakathi uphephile. “Sikubeka phambili ukuphepha komphakathi asifisi umuntu osebenzisa lesi sikhumulo azithole esengaphephile impilo yakhe seyisengcupheni, yingakho senza isiqinisekiso sokuthi lokho osekuyalelwa yile nhlangano siyakulandela, asithathi izindlela ezisheshayo,” kusho uMngwengwe.
Enaba ngalokhu uthe kungaba yinhlekelele uma kungase kube nobudedengu kwezokuphepha e-Orib nokungeke nje kuphela kwenzele phansi umnotho wendawo kepha nokuphepha kwabantu abangabagibeli kanye nomphakathi owakhe eduze kwesikhumulo lesi.
Okwamanje isikhumulo i-Orib silayisha kahlanu abaphumayo, kanye nakahlanu abangenayo. Lesi sikhumulo siphakela i-OR Tambo International Airport. Kanti senza okumqoka emnothweni wendawo. Ngaphandle kwezindiza siyaba nayindawo yemihlangano emqoka yokwenza ibhizinisi. Namathuba emisebenzi kubantu bendawo akhona njengoba kunabantu abasebenzayo abaqashwe inkampani yamabhanoyi, kanye nezinkampani ezisebenzayo ngaphansi kwalesi sikhumulo sezindiza.
UMngwengwe ufisa izakhamuzi saseMsunduzi zisisebenzise lesi sikhumulo ngoba singezinye zezinto ezakhela uMasipala imali. “Nanoma iliphi ilungu lomphakathi liyazuza ngokugibela komuntu indiza, yileyo mali esiyisebenzisayo ukuphinda sihlinzeke umphakathi ngezidingo, ngalokho uma amalungu omphakathi ezosebenzisa lesi sikhumulo izokwanda imali ezolekelela ekuhlinzekeni kwezidingo emphakathini,” kusho uMngwengwe.
Uqhube ngokuthi izinhlelo abanazo manje njengoMasipala ukuheha izinye izinkampani zezindiza njengoba kunenkampani eyodwa. “Isifiso sethu ukuheha ezinye izinkampani khona abagibeli bezokwazi ukuzikhethela, kanjalo bagibele nalokho okuhambisana nekhukhu labo. Siyazi ukuthi into esishayayo ukuthi lezi zinkampani zize kulesi sikhumulo (Orib) ukungabi nengqalasizinda ekwazi ukuthi ihambisane nalezi ezinye izindiza. Ezinye izindiza uthola ukuthi zidinga indawo ende zisagijima phansi, thina eyethu uthole ukuthi imfushane, lokho kugcina kuphikisana nokudingwa ilezo zinkampani, kodwa sizimisele ukukulungisa,” kulanda uMngwengwe.
Uveze ukuthi umphakathi uke uzitshele ukuthi amanani amba eqolo, bese beya eThekwini, “Abantu babheka ukuthi mhlampe thina siyabiza ngama-R200.00 bese bangasisebenzisi lesi sikhumulo, uthole beya eThekwini banganaki izindleko zikaphethroli, zamaTollgate, nezokupaka imoto. Zonke lezo zindleko ezigcina zingaphezulu kunalokho okubiza lana, ngoba bebezokonga nesikhathi sabo,” kuchaza uMngwengwe.