Bagxeka umasipala iMfolozi abangenagesi eNhlabosini
IBALELWA ekhulwini namashumi amahlanu imizi engakafakelwa ugesi esigodini saseNhlabosini, ngaphansi komasipala waseMfolozi, kuWadi 10.
Lokhu kuvele emhlanganweni walesi sigceme esiphethwe yiKhansela uMnuz. Skhumbuzo Mthethwa, obusehholo lomphakathi wakulendawo.
Lichaza kabanzi ngalesi simo iKhansela uMthethwa lithe, sekudlule iminyaka emine manje belinde umasipala ukuba ubafakele ugesi, kodwa kuze kube manje basahleli ebumnyameni.
Kulomhlangano obuhlanganise izinhlaka zonke zokusebenza eziqondene nalesi sigceme ezaziwa ngeWar Room, izikhulu zakwamasipala bezingabonwa nangokhalo.
‘Kade silindile ukufakelwa ugesi. Umasipala ukhombisa ukwehluleka ukugcina isibophezelo sawo.
Wasethembisa ukusifakela ugesi eminyakeni emine eyedlule, kodwa kuze kube manje, akukho osekwenzekile.
‘Sesawathumela wonke amaphepha ayedingeka, naqondene nesicelo sethu sokufakelwa ugesi, kuhlanganisa nohlu lwemizi eyayidinga ugesi, kodwa akukho mpendulo esesiyithole kwamasipala.
Asazi ukuthi sonani kuma- sipala njengoba engasinakile nje.
Kusiphatha kabi ukuthi ezinye izindawo ezingomakhelwane bethu njengaseMendu, Gegede, Mvamanzi naseMatholeni, zona zihleli ekukhanyeni.
UMthethwa ukugcizelele ukuzwakalisa ukudumala kwakhe ngokuhudula izinyawo kwezikhulu zikamasipala, ngokungawuhambeli lomhlangano, naphezu kokuba zazimenyiwe izikhulu zikamasipala.
UMxhumanisi kamasipala nomphakathi uMnuz. Philani ‘Bhanana’ Khumalo akatholakalanga ukuphawula, ngesikhathi sokushicilela.
150 houses still waiting for electricity