Twee botsings by padwerke
Roekelose en nalatige bestuur en dronkbestuur word deur die polisie ondersoek as oorsake van twee botsings wat Dinsdagaand binne ‘n uur op die De Rust-pad plaasgevind het. Die twee botsings het weerskante van ‘n gedeelte van die pad, wat deur stop-ry punte beheer word, plaasgevind.
In die eerste botsing is die bestuurder van ‘n konstruksievoertuig en die passasier in ‘n Opel Astra hospitaal toe geneem vir waarneming. Die botsing het reg voor die werksterrein van die konstruksiemaatskappy wat tans besig is met padherstelwerk, plaasgevind. Volgens die bestuurder van die Opel, ‘n onderwyser van George, het die konstruksievoertuig uit die rigting van Oudtshoorn gekom en voor die Opel ingedraai. “Ek was té na aan hom om uit te swaai, want hy het net eenvoudig voor my ingedraai.” Sy vrou is met hoofbeserings per ambulans hospitaal toe geneem en is Woensdagoggend ontslaan. Ten tye van die botsing was hulle op pad George toe nadat hulle by hulle kinders in Pretoria gekuier het.
Terwyl nooddienswerkers en verkeersbeamptes op die toneel was het hulle ‘n oproep ontvang van ‘n tweede botsing wat aan die Oudtshoornkant van die padversperring plaasgevind het. Die botsing is veroorsaak deur die bestuurder van ‘n Ford Bantam-bakkie wat van agter teen ‘n wit Mazda vasgery het. Die motor was deel van ‘n ry stilstaande voertuie wat by die stop-bordjie by die padwerke gewag het.
Met die aankoms van die Oudtshoorn Courant op die toneel het die bestuurder met toe oë in die bakkie gesit.
Dit blyk dat hy behandeling deur paramedici van die hand gewys het. ‘n Alkohol-asemtoets is deur ‘n verkeersbeampte gedoen waarna die man in hegtenis geneem is op ‘n klag van dronkbestuur. Volgens die bestuurder van die Mazda en ‘n vrou wat deel was van die span wat die verkeer by die stop-ry punt beheer, het die bakkie twee voertuie wat reeds stadiger gery het verbygesteek, voor hulle ingeswaai en van agter teen die Mazda gebots. “Die man het vinnig aangekom en ek kon nêrens heen gaan nie. Hy het amper die vrou met die vlag ook raakgery,” het die ontstelde bestuurder van die Mazda gesê. Sy vrou is in die botsing beseer en per ambulans hosiptaal toe geneem.
Daar is tans twee stop-ry punte op die pad tussen Oudtshoorn en De Rust. Die opgradering van die pad gaan ongeveer 18 maade duur en motoriste word gevra om uiters versigtig en geduldig te wees.