Motoriste kortwiek werk aan pas
Terwyl daar fluks gevorder word met herstelwerk aan die Swartbergpas is onverantwoordelike gedrag deur toeriste en hardkoppige motoriste besig om kop uit te steek. Heinrich Mettler, munisipale bestuurder van Prins Albert, het Woensdagmiddag tydens ‘n vergadering van die Swartberg-aksiegroep kommer oor dié gedrag uitgespreek. Hy sê mense verontagsaam padaanwysings wat hulle van die konstruksieterrein moet weghou. “Van die gebiede is lewensgevaarlik, veral onstabiele rotse en keermure. ‘n Ongeluk wag om hier te gebeur, met motorfietse, fietse, kwadfietse en 4x4’s wat oor naweke daar rondry. Die terreiningenieur sê die skade wat belhamels oor naweke aanrig, moet Maandae herstel word voordat die werkers kan aangaan.”
Mense wat die pad wederegtelik gebruik en skade aanrig dra daartoe by dat die herstelwerk langer kan duur wat die negatiewe ekonomiese impak op die dorp kan vererger. Ongeveer 2,5km van die Swartbergpas is in April deur ‘n vloed vernietig. Daar word die afgelope drie maande hard gewerk om herstelwerk te voltooi sodat die pas weer gebruik kan word.
Mark Steyn, raadslid van Prins Albert, het gesê van die rotsagtige gebiede is so gevaarlik dat dit onder druk sal ineenstort. “Dan gaan die pas heeltemal gesluit word en die herstelwerk nog langer duur.”
“Toeriste wat by die toerismekantoor in Prins Albert aandoen, is kwaad wanneer hulle ingelig word dat hulle nie van die Prins Albert-kant af oor die pas kan ry nie,” het Melinda Esterhuizen, toerismebeampte, gesê. Nog klagtes is dat motoriste die versperrings ignoreer of selfs spog dat hulle hekwagte aan die Oudtshoorn-kant, by die Hel-afdraaipad, omkoop om hulle deur te laat.
Mettler het gesê die Wes-Kaapse departement van vervoer sal einde Augustus die toestand van die pad ondersoek, en dan bepaal of voertuie op ‘n beperkte grondslag oor naweke deurgelaat kan word. Volgens Steyn is dit onaanvaarbaar dat toeriste die beplande projektydsraamwerk in gevaar stel.
“Wat tot nou uitgerig is, is reeds ’n wonderwerk. Ons kan op geen manier toelaat dat die werk belemmer word nie.”
Die aksiegroep het ook kommer uitgespreek oor die gevolge en moontlike eise sou iemand seerkry of rotse op voertuie instort. Om dit te voorkom sal dit wenslik wees om geen-toegangsborde ook aan die pad naby die Kangogrotte te plaas.