Weermagdokter se aansoek om ontslag afgekeur
Die verhoor van ‘n dokter verbonde aan die Oudtshoorn Infanterieskool wat tereg staan op ‘n klagte van verkragting asook twee klagtes van seksuele aanranding is Dinsdag in die Oudtshoorn-streekhof tot September uitgestel nadat sy aansoek om ontslag van die hand gewys is.
Danzil King se regsverteenwoordiger, adv. Benito Metembo, het die hof versoek om sy kliënt ingevolge Artikel 174 te ontslaan omdat die staat nie ‘n prima facie saak teen hom het nie.
Volgens hom het dr Charlston Dreyer, wat een van die klaers ondersoek het, getuig dat hy nie fout kan vind met die manier hoe die beskuldigde die jong rekruut ondersoek het nie.
Die vrou het volgens Metembo vrywillig versoek dat die beskuldigde haar ondersoek en hy het gestop toe sy hom gevra het om te stop met die vaginale ondersoek.
Sy kon onder kruisverhoor nie verduidelik waarom sy nie om hulp geroep het indien sy verkrag sou geword het nie.
Sy het ook eers toe sy wou uitgaan uitgevind dat die deur gesluit was.
Een van die offisiere wat getuig het kon ook nie verduidelik waarom die rekruut nie onmiddellik na die beweerde voorval by haar gekla het nie.
Wat die klagtes van seksuele aanranding betref het die klaer getuig dat die deure van die spreekkamer vir haar eie privaatheid deur die beskuldigde gesluit is.
Die beskuldigde het volgens Metembo ook nie aan die klaer se geslagsdele geraak nie.
“Die beskuldigde, wat oop kaarte met die hof gespeel het, behoort op die weergawes van die twee klaers vrygespreek te word,” het Metembo betoog.
Die staatsaanklaer, Nadia le Roux, het die aansoek teengestaan omdat daar wel getuienis voor die hof gebring is wat tot die beskuldigde se skuldigbevinding kan lei.
“Die staat sê nie daar is nie gebreke in sy saak nie, maar daar is ook geen gronde vir ontslag ten opsigte van Art 174 nie,” het sy gesê.
Volgens haar was die getuienis van die twee klaers nie van ‘n swak gehalte wat kan lei tot ontslag van die beskuldigde nie.
Streeklanddros Daniel Boks het die aansoek afgekeur. Hy het die redes vir sy weiering voorbehou.
Die saak is daarna vir voortsetting van verhoor tot 20 September uitgestel en King se borgtog van R5 000 en sy borgvoorwaardes is tot dan verleng.