Burgemeester positief oor herstelstrategie

Die Eskom-skuld van R54 miljoen waar deur die Oudtshoorn munisipale raad in die gesig gestaar was is verminder tot R8,3 miljoen.

Dit is volgens die burgemeester, Colan Sylvester, een van die bewyse dat die nuwe raad se omkeerstrategie van die afgelope tien maande suksesvol is. Volgens ‘n mediaverklaring wat hierdie week deur die munisipaliteit uitgereik is, is verskeie suksesse reeds behaal. Behalwe vir die vermindering van die Eskom-rekening het die nuwe raad ook daarin geslaag om uitstaande skuld aan krediteure van R110 miljoen te verminder na R28,5 miljoen.

Sylvester het gesê dat verskeie strategieë en streng maatreëls die afgelope tien maande toegepas is om Oudtshoorn se finansiële penarie wat die raad geërf het om te swaai. Hy het ook daarop klem gelê dat gereelde raadsvergaderings ‘n integrale deel van die omkeerstrategie is.

“Een van die redes waarom Oudtshoorn in 2015 onder administrasie geplaas is, was die vorige raad se onvermoë om gereelde raadsvergaderings te hou. Vandag is die munisipaliteit trots om aan te kondig dat daar reeds 17 raadsvergderings tussen Augustus 2016 en Junie 2017 gehou is. Vier van die vergaderings was gewone raadsvergaderings.”

‘n Verdere treë vorentoe is dat al die top bestuursposte in die munisipaliteit vir die eerste keer in meer as vyf jaar deur permanente aanstellings gevul is. Die poste ter sprake is dié van die munisipale bestuurder en verskeie direkteurs waarin amptenare tydens die vorige raad se termyn waargeneem het. Alhoewel groot vordering reeds gemaak is, sê Sylvester daar lê steeds ‘n reusetaak voor voordat die munisipaliteit as finansieel gesond verklaar kan word.

Die volledige mediaverklaring in Engels, is beskikbaar op die Oudtshoorn Courant se webtuiste.