Real Life Commit ontvang skenking
Real Life Commit, ‘n nie-winsgewende organisasie wat hom daarop toespits om persone met gestremdhede te help om hulself te bemagtig en werk te kry, het Woensdag kantoortoerusting as skenking by die parlementslid, Dennis Joseph gekry.
Hy het die toerusting, wat ondermeer skryfbehoeftes, tafels en stoele insluit, namens die parlement oorhandig.
Susanna Spires, die stigter van Real Life Commit, sê hulle doel is om persone met gestremdhede te help met kursusse sodat hulle kan gaan werk.
“Klein Karoo sport vir persone met gestremdhede val ook onder ons. Mense sonder gestremdhede vergeet so maklik dat persone met gestremdhede ook kan werk en basies presies dieselfde werk kan doen as mense wat nie gestremdhede het nie. Van ons kursusgangers het al werk by die Oudtshoorn-hospitaal, ambulansdienste en die munisipaliteit gekry. Hulle moet net die regte geleenthede kry. ‘n Fisiese gestremdheid hoef nie as ‘n agterstand gesien te word nie,” het sy gesê.
Joseph het op sy beurt gesê die kantoortoerusting wat aan Real Life Commit geskenk is, is net ‘n druppel in die emmer, maar hy hoop hulle groei van krag tot krag.
“Ons moet meer geleenthede en ondersteuning gee aan veral organisasies wat persone met gestremdhede wil help,” het hy gesê.
Die geleentheid is ondermeer deur Youth Academy, die Oudtshoorn-munisipaliteit en Suff Academy ondersteun.