Twee vas vir onwettige drank en dwelms
Twee vermeende drank- en dwelmsmokkelaars van Zoar het hulle verlede week teen die gereg vasgeloop
Volgens ao. Jan Cederas, woordvoerder van die Ladismith-polisie, is ‘n operasie verlede week deur die Ladismith-polisie, die Attakwahonde-eenheid en lede van die openbare orde polisie gehou.
“Hulle het hulle daarop toegespits om die bedrywighede van smokkelaars te ontwrig. Die operasie was tussen 10:00 en 14:00 gehou. Die lede het verskeie huise in Ladismith ook deursoek, maar die verdagtes is in Zoar in hegtenis geneem,” het hy gesê.
Volgens Cederas is ‘n 57-jarige man in 5de Laan vir handeldryf in drank sonder ‘n lisensie in hegtenis geneem en die polisie het op 189,5 liter drank beslag gelê. “Kort daarna is ‘n 45-jarige man in Droëvlei, Zoar, gearresteer vir besit van dagga, tik en mandrax. Daar is op 624 gram dagga, 6 gram tik, 5 tik strootjies en 8 mandrax tablette beslag gelê.”
Beide mans het verlede Vrydag in die Ladismith-landdroshof verskyn.
“Die hoof van sigbare polisiering, kaptein Henry Edwardes, het die lede geprys vir hul opoffering en toewyding. Hy het ook sy dank uitgespreek teenoor die openbare orde polisiering en Attakwahonde-eenheid omdat hulle altyd Ladismith ondersteun.” het Cederas gesê.