Kannaland kry verslag oor forensiese ondersoek

‘n Vorderingsverslag ten opsigte van ‘n forensiese ondersoek wat in Kannaland aan die gang is, is Vrydag 7 Julie aan die raad voorgelê. Die forensiese ondersoek volg op beweringe van bedrog, korrupsie en finansiële wanbestuur in die Kannaland-munisipaliteit tussen 2011 en 2016.

Volgens ‘n mediaverklaring van Anton Bredell, Wes-Kaapse minister van plaaslike regering, omgewingsake en ontwikkelngsbeplanning, het die aanvanklike ondersoek ongerymdhede gevind met ten minste vyf diensverskaffers wat tussen 2011 en 2016 deur die Kannalandse munisipaliteit aangestel is.

Volgens Bredell het die ondersoek bevind die meerderheid van hierdie aanstellings is onregmatig gedoen sonder om volgens voorgeskrewe riglyne te werk te gaan. Dit het ook aan die lig gekom dat die dienste wat deur die diensverskaffers gelewer was nie waarde vir geld was nie. “Die slotsom van die ondersoek was dat die onregmatige aanstellings en betalings vir dienste op ‘n moontlike onregmatige uitgawe van R14 741 584 uitgeloop het,” het hy gesê.

Volgens die mediaverklaring sê Graham Paulse, hoof van die departement van plaaslike regering in die Wes-Kaap, dat daar verskeie oortredings van munisipale wetgewing deur vier munisipale amptenare voorgekom het. Van hulle is steeds in diens van die munisipaliteit.

Daar word aanbeveel dat dissiplinêre stappe teen amptenare wat steeds in diens is, geneem moet word en dat moontlike kriminele klagtes ook by die polisie gelê moet word.

Kannaland was tot met die plaaslike verkiesing in 2016 deur ICOSA bestuur. Na die verkiesing verlede jaar word die munisipaliteit deur ‘n nieamptelike samewerking tussen die DA en ANC bestuur.

Volgens Bradley Benades, woordvoerder van ICOSA, het raadslede geen insae in die vorderingsverslag gehad nie. “Die burgemeester het ‘n paar sinne op ‘n bladsy in die raadsvergadering gelees, maar ons het dit nooit onder oë gehad nie,” het hy telefonies gesê.

In antwoord op ‘n navraag aan Bredell oor hierdie stelling het sy kantoor gesê: “Wat op 7 Julie aan die Kannaland munisipale raad voorgelê is, is ‘n hoëvlak terugvoering van die vordering wat tot op datum gemaak is met die forensiese ondersoek wat deur die provinsie se forensiese eenheid op versoek van die huidige burgemeesterskomitee van Kannaland onderneem is.”

Volgens hom was die inhoud van die vorderingverslag dieselfde as die mediaverklaring wat uitgereik is. Hy voeg by dat die ondersoek in Kannaland tans voortgaan aangesien dissiplinêre en kriminele klagtes nog gelê moet word.

Volgens Bredell het die ondersoek bevind die meerderheid van hierdie aanstellings is

onregmatig.