Danser presteer in Los Angeles
‘n Talentvolle 14-jarige danseres van Volmoed, Hybre-Ann Hefke, het verlede week ‘n reuseprestasie behaal deur ‘n goue medalje te verower in die wêreldkampioenskappe vir uitvoerende kunste (WCOPA) in Los Angeles, Amerika.
Hybre-Ann, ‘n graad 9-leerder van Hoërskool Oudtshoorn, is drie weke gelede as deel van die SA-span na Los Angeles om Suid-Afrika op die wêreldverhoog in drie dansitems te verteenwoordig. Sy het ‘n goue medalje in die etniese dansafdeling (solo), silwer in die groepsdans en brons in die Hip-Hop (solo) verower.
Hybre het twee jaar gelede by die Dynamite Dance Studio in Oudtshoorn aangesluit. Onder die leiding van haar dansafrigter, Nadia du Preez, het sy verlede jaar tydens die SAkampioenskappe in Rustenburg gekwalifiseer vir die wêreldkampioenskappe.
Sy het die afgelope ses maande hard gewerk en met hope toewyding haarself voorberei om haar doel te bereik. Sy het, ten spyte van terugslae soos die verlies van haar oupa, die onlangse diagnose van ‘n ernstige oogsiekte (keratokonus), asook ‘n druk akademiese program haar fokus behou.
Haar deursettingsvermoë en die lojale ondersteuning van haar familie, kerk (St. Jude Anglikaans) en goeie vriende soos Marelize Grunglingh en Lisa-Mari Stander het haar deurgedra.
In die laaste drie maande het sy, in die voorbereiding vir haar etniese dansuitvoering waarin sy uiteindelik haar goue medalje gewen het, ook waardevolle leiding en insette van Shapiro Michaels, dansinstrukteur van Bridgton, gekry.
Die etniese drag waarin sy op die verhoog haar wenner-danspassies uitgevoer het, was ontwerp deur Christiaan, ontwerper van Coco Boutique in Oudtshoorn.