Halfmiljoen vir boere ingesamel
Die grootse poging van die Herold-landbouvereniging om geld in te samel vir boere wat ly onder die voortslepende droogte, het ‘n bedrag van bykans ‘n halfmiljoen rand ingesamel. ‘n Dinee is verlede Donderdagaand by Oppie Plaas Venue in Waboomskraal aangebied waar 26 tafels teen R10 000 elk binne ‘n paar weke uitverkoop was. Sedert die lot van die boere bekend gemaak is, het die borge en skenkings ingestroom.
Geld wat ingesamel word, sal gebruik word om voer, wat elders in die land geskenk word, na Herold te vervoer. Die landbouvereniging betaal 60% van die koste, en die individuele boere die res van die koste.
Nog voor die dinee Donderdagaand begin het, het gholfspeler Louis Oosthuizen, Virbac en RuVasa elk R15 000 of meer geskenk. “Verdere skenkings stroom steeds in,” sê Weeber Truter, wat met die hulp van die vereniging se komitee die nodige reëlings getref het om boere in die bedieningsgebied van Agri Herold Boerevereniging te help oorleef totdat reën uitkoms bring.
Hierdie reddingspoging het begin toe Truter bewus geraak het van duisende bale gras wat op die plaas Wilde Als buite Bloemfontein gesny word in voorbereiding vir die saamtrek van Angus Buchan vroeër vanjaar. Die plaas behoort aan die voormalige Springbok-rugbyspeler, Ollie le Roux.
Tot op hede het Le Roux reeds meer as 2 000 bale gras aan Herold-boere geskenk en ander skenkers het intussen ook na vore gekom.
Le Roux was een van die sprekers tydens Donderdagaand se dinee en het sy geloofsgetuienis gelewer om die boere te bemoedig in hierdie tyd van waternood.
Nog ‘n rugbyspeler, die 27-jarige CJ Stander, van ‘n plaas buite George, wat tans vir die Britseen Ierse Leeus rugby speel, het in sy boodskap aan veral die jong boere gesê hulle moet op God vertrou.
Die hoofspreker van die aand was Omri van Zyl, uitvoerende bestuurder van Agri SA, wat ook ‘n boodskap van hoop gebring het. “Julle inspireer my. Julle is nou in die vuur, maar julle moet fokus. Ons gaan saam hier deur kom. Julle is in die regte bedryf: miljarde mense in Afrika moet eet, en Suid-Afrika is die enigste land in Sub-Sahara Afrika wat voedselsekerheid het.”
Die volgende borge het die aand moontlik gemaak:
Deon en Dean Barnard, eienaars van Oppie Plaas Venue, Klein Karoo Toyota, Agri-SA, Agri Wes-Kaap, Anton le Roux Vervoer, SSK, AgriLand, GWK, BKB, Absa, Wesbank, FNB, Standard Bank, Klein Karoo Saadbemarking, Klein Karoo Agri, Group Editors, Sanlam Private Beleggings, De Heus, Mohair, RuVasa, Sonqua Consulting, Wilderness Hotel, Bayer, George Munisipaliteit, InteliGro, PSG Wealth, Fanus Truter en Moore Stephens, RCL Foods, Irrikor, Agrico, Safari, Afrivet, Roelcor, Tyres&Treads, Electrical Pro, Van Rensburg Foods, Van Loveren Vineyards, Cavalli, Sanlam Blue Star Fynbos Wealth, Anna-Marie Colling van Worcester, Willow Creek van die Nuy, Rohann en Marlise Steenekamp, Wouter Lutske Makelaars BK / Discovery, George Muller, Wilgewandel, Virbec, Moov, Olivier en Vermeulen Begrafnisdienste, SABHF Brewery, JD Implemente, Tienie Halgryn, Jannie Meyer, Johan Brooks, Coffee Bean, Eon Coetzee, Kobie Fourie, Lood, SFM, Reinier Zietsman en Jan Erasmus.
Vir meer besonderhede oor Help Herold Boere in Nood, besoek die webblad by www.facebook. com/Help Herold Boere In Nood of kontak Patrys Erasmus by 044 888 1624 of perasmus@ tagri.co.za