Gesamentlike netwerkaand onderstreep samewerking
Gesonde samewerking tussen die drie grootste ekonomiese rolspelers in Oudtshoorn - besigheid, toerisme en landbou was Dinsdagaand duidelik tydens die maandelikse netwerkaand van die Oudtshoorn-besigheidskamer.
Anders as vorige geleenthede, waar een instansie die aand aanbied het Agri Klein Karoo, Oudtshoornen De Rust-toerisme en Oudtshoorn-besigheidskamer saamgespan vir die geleentheid.
Meer as 120 lede van die onderskeie instansies het die aand by Safari Volstruisskouplaas bygewoon. Tydens hulle spreekbeurte het die drie voorsitters, Gideon Badenhorst (besigheidskamer), Joey Potgieter (Agri) en Billy Engelbrecht (toerisme) afsonderlik ‘n gemeenskaplike boodskap oorgedra dat samewerking tussen die drie organisasies uiters noodsaaklik is vir ekonomiese groei in die dorp. Tydens sy verwelkoming het Jaco Vorster, mede-eienaar van WesHandelshuis, gesê sake in Oudtshoorn moet in ‘n breër konteks gesien word en die samewerking tussen die drie instansies is vir hom ‘n bewys dat die breër konteks aangespreek word.
Gideon Badenhorst het na die samewerking van die munisipaliteit verwys as ‘n belangrike en positiewe komponent van die sakesektor in Oudtshoorn en die burgemeester, Colan Sylvester, die speaker, Julia le Roux en raadslede Johan Fourie en George Kersop bedank vir hulle teenwoordigheid.
Joey Potgieter het op die wedersydse afhanklikheid tussen landbou en die sakesektor gewys. “As dit goed gaan met die landbou, gaan dit goed met besighede en as dit goed gaan met besighede gaan dit goed met landbou. Ons vul mekaar aan.”
Billy Engelbrecht het gaste daarop gewys dat toeriste en besoekers se ervaring van Oudtshoorn dikwels tot beleggings in die dorp kan lei.
“Besoekers kom nie net vir ‘n kuier en vertrek dan nie. As hulle ervaring positief is, is daar rede vir hulle om terug te keer en eiendom hier te koop of besighede te begin. Daarom is dit belangrik dat ons dorp bemark moet word sodat besoekers ‘n positiewe beeld ontvang.
Hy het ook beklemtoon dat landbou in Oudtshoorn en toerisme hand aan hand loop, want ‘n groot deel van die landbousektor bied ook toeriste ervarings.