Boorling van Dysselsdorp speel eerste plek los
Sulayman Human (24), ‘n boorling van Dysselsdorp, se vingerpassies op klaviernote het hom in 2016 ’n derde plek in die ATKV-Muziqkompetisie besorg, maar nou in 2017 spog hy nie net met die eerste plek nie, maar ook ’n prys vir die beste vertolking van ‘n barok- of klassieke werk.
Hy het Saterdagaand die gehoor meegevoer gehad in die ATKV se nasionale instrumentale klassieke musiekkompetisie, Muziq, in die ouditorium van die Hugo Lambrechts-musieksentrum in Parow.
Sulayman is tans besig met sy meestersgraad aan die Universiteit van Stellenbosch. Sy klavierloopbaan het as 12-jarige begin toe een van sy onderwysers gevra het wie musieklesse wil neem en hy sy hand opgesteek het.
“Ek het nie eens geweet hoe ’n klavier lyk of klink nie,” sê Sulayman.”
Sulayman het aan die begin elke dag 16:00 afgesit na sy musiekonderwyser toe. Daar was nie ’n klavier by die huis om op te oefen nie. Dit het egter verander toe die Barrow-familietrust, die
KKNK en die ATKV saamgespan het om vir hom ’n klavier te koop.
“Toe kon ek oefen net wanneer ek wou. Ek dink ek het my gesin mal gemaak. Darem het ek nie in 7de Laan-tyd geoefen nie,” spot Sulayman.
Hy oefen elke dag en sommige dae tussen agt en tien uur per dag en droom daarvan om ’n konsertpianis en ’n dosent te word.
Instrumentaliste tussen die ouderdomme van 15 en 27 kon hulle vir Muziq inskryf.
Sulayman ontvang prysgeld van R65 000 en ook ’n R8 500-prys vir die beste vertolking van ’n barok- of klassieke werk. Cameron Williams wat die saksofoon speel, was tweede en ontvang R32 000. Cameron het ook ’n addisionele prys van R8 500 ontvang vir die beste vertolking van ’n Suid-Afrikaanse werk. Die violis Jeffrey Armstrong was derde en ’n prys van R16 000 is aan hom toegeken.
Die ander twee finaliste wat saam met Sulayman, Cameron en Jeffrey hul staal getoon het, was Brian Bae (klavier) en Jonathan Mayer (viool). Al vyf finaliste ontvang R10 000.
Die nasionale Afrikaanse radiostasie RSG was weer vanjaar die mediavennoot van ATKV-Muziq.