Wanneer kry Rust en Vrede aandag?
Die pragtige Rust en Vrede waterval buite Oudtshoorn waar die dorp se drinkwater vandaan kom, se hekke is al vir amper vyf maande gesluit. Dit na die storm wat in Maart vanjaar erge skade aangerig het. Die bruggies is beskadig, groot boomstompe lê in die water en die pad is verspoel. Na die brand wat verlede jaar in die gebied ontstaan het, het die “waterhuis” waar die inwoners se drinkwater opgevang word ook in die slag gebly en tot op die grond afgebrand. Nou drink die wilde diere ook saam met die inwoners dieselfde water. Die draadheinings is stukkend en die toilette is in haglike toestande. Op die terrein werk een werker, wat elke tweede naweek as afloshekwag ook moet instaan. Wie is verantwoordelik vir die Rust en Vrede waterval? Wat is die Oudtshoorn-munisipaliteit se plan met die waterval? Wanneer kan die besoekers weer die hekke oop verwag aangesien die warm somer op pad is.
Anonieme inwoner
(Die brief is aan die munisipale woordvoerder gestuur vir kommentaar vanaf die betrokke afdeling. Redakteur)
Augustus 1967
Daar heers voorspoed en vooruitgang in die dorp, maar in die proses word twee historiese bakens prysgegee. Goeie reëns het uitgesak en die Calitzdorpdam hou aan oorloop...
2 Augustus
‘n Dogter uit Ladismith,
Marianne Garisch (vandag Marianne Spies) vertrek na Amerika as
‘n uitruilstudent van die
American Field Service.
Sy is een van die 95 Suid-Afrikaners, wat in Rotterdam by die ander uitruilstudente uit ander lande, sal aansluit om daarvandaan per skip na New-York te vertrek om ‘n jaar lank in Amerika skool te gaan. Marianne gaan tuis by die Brownyard-gesin in die stad Erie in die staat Pennsylvania.
5 Augustus
Die departement van gemeenskapsbou in Pretoria het aan die Oudtshoorn se afgevaardigdes ‘n lening vir behuising toegestaan. Ekonomiese en sub-ekonomiese huise word beplan, 68 huise in Noord- en Suid-End en 312 huise in Bridgton. Mnr. Arnold de Jager, as voorsitter van die Dorpsraad se Behuisingskomitee, sal die proses lei.
9 Augustus
Die nuwe Rooms-Katolieke St Saviour Katedraal in Baron van Reedestraat word met ‘n plegtige seremonie ingewy. Hoë kerkamptenare van oor die hele land, woon die inwyding by wat 90 minute sal duur en wat in Latyns, Engels en Afrikaans gevoer sal word. Die Oudtshoorn Courant staan twee bladsye aan die spesiale geleentheid af. Ongelukkig moes die oorspronklike St Saviour kerkie, die eerste sandsteengebou in Oudtshoorn (hoek-steen gelê in Jan 1860) vir die bou van die mo-derne Katedraal gesloop word.
12 Augustus
Op ‘n skoolraadsvergadering word die besluit om die perseel van die Meisieskool aan die Departement van Justisie af te staan, bekendgemaak. Van die onderhandelaars was mnre. Dan Maree LPR en Chris Heunis LUK. Tog stel die Skoolraad ‘n paar voorwaardes aan die afstaan van die skoolgebou: die Seunskool moet aan die Munisipaliteit oorhandig word vir ‘n museum en ‘n kultuursentrum; die Munisipaliteit moet onderneem om die sandsteenkoshuis langs die seunskool te sloop. (Al wat van die historiese sandsteengebou oorgebly het is die grasperk langs die C P Nel-museum.)
16 Augustus
Die nuwe kraglyn tussen Oudtshoorn en De Rust is nou in aanbou. Ongeveer 100 plase sal van krag voorsien word. Die kraglyn loop al langs die teerpad tot by Van Wykskraal draai af na Dysselsdorp dan na Le Rouxstasie, Middelplaas, Stompdrifdam en na De Rust. Daar sal vertakkings wees na Hazenjacht en Oude Muragie.
Die C P Nel-museum [toe nog in die huidige Gesinsorggebou op die hoek van Hoog-en Loopstraat] hou hulle jaarlikse straatkollekte. Fondse is nodig vir die oorskuif na die leë gebou van die ou seunskool. N A Smit, voorsitter van die Trusteeraad, hoop om die volgende jaar te kan intrek (dit sou eers in 1972 gebeur).
Matjiesrivier-bobbejane gaan gevang en gebruik word vir navorsing in nieroorplantings. Mnr. Lappa Munnik LUK, belas met hospitale doen ‘n beroep op boere, wat las het van vernielsugtige bobbejane, om te help met die vang van hierdie diere wat dan na die Karl Bremer Hospitaal gestuur moet word. Twee Amerikaanse professore wil in SA kom navor-sing doen.
Mnr. Flip Terblanche van Matjiesrivier het ingewillig om met die projek te help.
(Elke uitgawe van die Oudtshoorn Courant van die afgelope bykans 140 jaar word in die CP Nel museum se argief bewaar. Lesers is welkom om na die uitgawes te gaan loer.)