Joernalis van Group Editors sportjoenalis van die jaar
Christo Vermaak, joernalis van die Oudtshoorn
Courant, is verlede week aangewys as die Eden-sportraad se sportjoernalis van die jaar.
Die glansfunksie waartydens die Eden-sportraad verskeie sportmense en rolspelers vereer het, het Donderdagaand 27 Julie in die Riversdal-burgersentrum plaasgevind. Vermaak is met die toekenning outomaties ‘n finalis vir die Wes-Kaapse sportraadtoekennings wat op Saterdag 16 September in Kaapstad plaasvind.
Hy het in April 2003 by Group Editors aangesluit en reeds sportberiggewing vir al Group Editors se koerante gedoen. Hy is tans verantwoordelik vir sportberiggewing en koördinering vir die Oudtshoorn Courant.
Behalwe om aan Eden en Oudtshoorn se sportgebeure dekking te gee en te publiseer in die Oudtshoorn Courant, asook al Group Editors se koerante word sy mediadekking deur verskeie ander koerante, nasionaal erken en gebruik.
Volgens Vermaak is Oudtshoorn en die Eden-distrik die sportmekka van Suid-Afrika. Die gebied toon geweldige groei in nasionale sportgebeure wat hier aangebied word en internasionale atlete word gereeld gelok vir deelname aan verskeie sportgeleenthede.
As sportjoernalis dek Vermaak ‘n wye verskeidenheid sportsoorte en gee mediadekking aan die Eden distrik se sportsterre wat internasionaal, nasionaal, sowel as plaaslik deelneem, of as administrateurs en afrigters optree. Hierdie atlete sluit die meesteratleet Toy Ungerer en fietsryers soos Corné Bence, Louis Visser (JNR) en verskeie ander in.
So is van sy internasionale berigte al op SuperSport gebeeldsend, en ook op Kwêla, kanaal 144. Vermaak skroom nie om sy beriggewing, foto’s en inligting nasionaal – en internasionaal met ander media-instansies te deel nie. “Vir my is dit deel van die bemarkingsproses van atlete en sport in Eden. Hulle is ons trots en hul harde werk voed ons ekonomie.”
Vermaak gee mediadekking aan meeste sportkodes binne die Edens-sportraad se affiliasies. Sy area vir mediadekking strek tot Noord van Beaufort-Wes, Kannaland en binne die landelike gebiede.