Klassique beste nog
Die uitvoerende hoof van Kunste Onbeperk, Rhodé Snyman, is in haar noppies met die sukses van die negende Klein Karoo Klassique wat voorverlede naweek in Oudtshoorn aangebied is. “Die negende Klein Karoo Klassique is deur die grootste gehore in dié fees se geskiedenis bygewoon,” het sy hierdie week gesê.
“Klassique se toenemende groei, te midde van die huidige ekonomiese klimaat, dui daarop dat die fees se lojale gehoor waardering vir vanjaar se toeganklike musiek, groter variasie op die program en bekostigbare kaartjiepryse gehad het.,”
Die sukses van vanjaar se Klassique is volgens haar, daaraan toe te skryf dat die fees opnuut daarin geslaag het om kunsmusiek toeganklik te maak en deur verskeidenheid te kenmerk. Die verskeidenheid het gewissel van kitaar tot outentieke barokinstrumente en van soprane tot ’n verkorte opera.
Vanjaar is die fees op een perseel, die NG Moederkerk se terrein, aangebied wat dit vir feesgangers moontlik gemaak het om tussen uitvoerings te kuier en te ontspan. ‘n Restaurant is ook vir die duur van die fees by die kerk ingerig.
“Ons het groot waardering vir die finansiële bydrae van ons hoofborge, die Rupert Musiekstigting en die Shanti Nilaya Trust, wat ons in staat gestel het om kaartjiepryse dieselfde as verlede jaar te hou. Ons is ook dankbaar vir die ondersteuning van die ATKV, die Oudtshoorn Courant,
RSG, Die Burger, Hyundai Oudtshoorn en Klein Karoo International, sonder wie dié sukses nie moontlik sou wees nie.” vertel sy.
Snyman vra dat feesgangers terugvoer oor Klassique na info@kunste.org.za moet stuur en ook nou reeds volgende jaar se datums moet aanteken.
Die Klein Karoo Klassique is volgende jaar tien jaar oud en om dit te vier is die fees ‘n dag langer. Die Klassique word in 2018 vanaf Donderdag 9 tot Sondag 12 Augustus aangebied.
Meer inligting oor Klein Karoo Klassique is beskikbaar by www.klassique.co.za, of op Facebook (@KleinKarooKlassique), of Twitter by @ kkarooklassique.