Boerevereniging skenk R12 000 aan Laurus
Bestuurslede van die Kangovalleie Boerevereniging het Dinsdag ‘n tjek ter waarde van R12 000 aan Laerskool Laurus oorhandig.
Die tjek kom uit die opbrengs van die suksesvolle eerste Kango Agri Expo wat op 23 Mei vanjaar op Schoemanshoek gehou is waartydens meer as 40 uitstallers hul produkte en dienste aan boere kon bekendstel.
Laerskool Laurus, met 430 leerders, is drie jaar gelede as die enigste eko-skool op die dorp geregistreer, en het in samewerking met die Gourits Biosfeerreservaat (GCBR) intussen ‘n waterbesparingsprojek van stapel gestuur.
“Ons het besluit om ‘n skenking aan Laerskool Laurus te maak omdat ons as boere so baie met hulle in gemeen het: ons is afhanklik van die natuur se hulpbronne en by Laurus leer die kinders die waarde van bewaring van die natuur,” het Chris Botha, voorsitter van die vereniging tydens die oorhandiging gesê. “Die kinders is die landbouers van die toekoms en hulle sal moet sorg dat die landboubedryf volhoubaar is.
“Ons beskou hierdie bydrae as ‘n simboliese saadjie wat ons plant, wat hulle kan laat groei tot ‘n magtige boom wat vrugte dra. Dit is hoe ons wil teruggee aan die gemeenskap.”
Die geld word gebruik om ‘n buitelug ekoklaskamer, wat in ‘n voorheen onbenutte ruimte in die middel van die skoolgebou ingerig is, van ‘n dak te voorsien.
Die natuurklas is sedert 2015 in gebruik, maar word voortdurend verbeter.
“Die klas skep vir die kinders ‘n positiewe leeromgewing,” sê Ronelle Huysamen, die hoof. “Baie van die kinders het nie ‘n tuin by die huis nie en word nêrens anders blootgestel aan ‘n natuurlike omgewing nie.”
Die natuurklas sluit ‘n lowergroen tuin in waar insekte voorkom en skilpaaie vrylik rondbeweeg. “Die kinders kan sien hoe die plante groei en hoe die natuur funksioneer. By die werksbanke kan hulle praktiese ervaring opdoen en in hierdie klas kan hulle mors sonder om raas te kry.”
‘n Watertenk, waarin afloop-reënwater opgegaar word, sal gebruik word vir ‘n hidroponiese stelsel waarin groente gekweek sal word. Missproeiers wat teen die dak geïnstalleer is, sal die leerders op ‘n snikhete dag koel hou.
“Ons is afhanklik van die gemeenskap vir borge en ons bedank julle hartlik vir julle bydrae. Ons wil graag in die toekoms weer saam met julle werk,” het Huysamen gesê.
As eko-skool het die skool reeds ‘n brons- en silwermedalje ontvang en was in 2016 die ontvangers van die gesogte Nasionale Groenvlagtoekenning. Vanjaar sal hulle ‘n goue sertifikaat ontvang, en in 2018 die Internasionale Groenvlag.
Die Matjiesrivier Crèche sal ook ‘n geldelike bydrae ontvang.