Munisipaliteit gee studiebeurse

Uitgawes wat vir die Burgemeestersbal in Maart aangegaan is, is gedek deur die geld wat met die funksie ingesamel is en ‘n totale wins van R50 382,55 is getoon. Die Oudtshoorn Courant het ‘n navraag oor die uitgawes aan die munisipaliteit gerig na aanleiding van ‘n plasing op die Facebook-blad Openbaarmaking in Ousdtshoorn waar die uitgawes van die bal bevraagteken is. Die plasing het gelui:

“Het die burgemeester die waarheid gepraat toe hy gepraat het van die maskerbal se uitgawes: ‘sonder dat Oudtshoorn-munisipaliteit ‘n hand in sy eie sak hoef te steek’?. In die Quarterly Implementation Reports sien ons die munisipaliteit het R25 823,55 betaal.

In die genoemde kwartaallikse verslae word die uitgawes as volg gerapporteer:

Uitlê van dansvloer - R8 407,50 Aankoop van maskers - R4 000 Eetgerei en tafeldoeke en bykomstighede - R13 416

‘n Totaal van R25 823,55.”

Ntobeko Mangqwengqwe, woordvoerder van die Oudtshoorn-munisipaliteit, het die uitgawes bevestig, maar gesê, “die uitgawes is gefinansier uit die inkomste van die maskerbal. Die bruto inkomste was R76 206.10.

Die maskerbal is aangebied om geld in te samel vir instansies wat met mishandelde vroue en weeskinders werk, het burgemeester Colin Sylvester gesê, “Ons is besig om instansies te identifiseer, wat ons finansieel kan bystaan.”