Oudtshoorn-skrywers ontvang pryse
Die Oudtshoorn-skrywers wat gedurende Mei as plekwenners in ‘n nasionale skryfkompetisie aangewys is, het verlede naweek ‘n slypskool van die bekende letterkundige prof. Etienne van Heerden in Bloemfontein bygewoon.
Die slypskool was deel van die prys in die skryfkompetisie van die Bloemfonteinse skrywersvereniging (BSV) wat Maretha van der Westhuizen, Anna-Mart Schutte en Hannes Visser ontvang het. Van der Westhuizen en Visser het onderskeidelik eerste en tweede plekke gekry in die opeafdeling vir kortverhale deur ongepubliseerde skrywers. Anna-Mart Schutte, ‘n gr. 11-leerder van Langenhoven Gimnasium, het weggestap met die eerste plek in die senior afdeling vir skole en is ook aangewys as die algehele wenner in die skole-afdeling. Sy kon as gevolg van skoolverpligtinge nie die slypskool en prysuitdeling bywoon nie. Haar pryse is Woensdagoggend tydens ’n saalbyeenkoms namens die BSV deur Hannes Visser aan haar oorhandig. Hy het die leerders van Gimmies uitgedaag om volgende jaar ‘n groot poging aan te wend en vir die kompetisie in te skryf.
“Dit was Anna-Mart se heel eerste inskrywing en daar skop sy stof in die oë van gereelde deelnemers van byvoorbeeld DF Malan wat jaarliks honderde inskrywings stuur.”
Volgens Visser en Van der Westhuizen was die slypskool van prof. van
Heerden uiters leersaam.