SWD Arende pak omgekrapte Grens-Bulldogs
Die gelykopuitslag wat die SWD Arende in hul eerste Curriebekerwedstryd (eersteliga) verlede Vrydag teen die Luiperds in Potchefstroom afgedwing het, is gewis ‘n sielkundige oorwinning vir die besoekers.
Die gesigsuitdrukkings ná afloop van die wedstryd het boekdele gespreek: die tuisspan se skouers het gehang terwyl die Arende soos Lotto-wenners gepronk het.
‘n Oorwinning in jou wegwedstryde in dié taai kompetisie is altyd ‘n bonus. Maar as jy in ‘n tuiswedstryd vasval, besoedel jy die gemoedere.
‘n Gelykopuitslag in ‘n moeilike wegwedstryd is dus nooit te versmaai nie. Dit sal die Arende loon om die goeie dinge uit die Luiperds-wedstryd ter harte te neem en in Vrydagaand se kragmeting teen die besoekende Grens-Bulldogs toe te pas.
Dis al ou nuus en mens wil nie daarop hamer nie, maar die Arende se rugbyseisoen tot dusver vanjaar verloop goor.
Die Grens-bulle sal oorgehaal wees om hul puik spelpeil op Outeniquapark voort te sit en die Arende se seisoen verder te bederf. Die besoekers het ‘n netjiese pak voorspelers wat hul man teen enige span in die Eersteliga kan staan. En agterlangs is ‘n tros snellers wat feitlik van enige plek op die veld met die bal wil aanval.
Die Arende sal egter moed put uit verlede Vrydag se vertoning teen die omgekrapte Luiperds en met stewige vertoning - en tuisoorwinning - weer nuwe lewe in sy Curriebekerveldtog wil blaas.
Die span was met druktyd nog nie bekend nie.