Spring Roses vier 45ste met uitkloptoernooi
Alle paaie lei Saterdag na die Bridgton-sportterrein waar Spring Roses-rugbyklub hul 45ste bestaansjaar vier.
Die aksie begin om 10:00 wanneer landelikeen fabriekspanne mekaar in ‘n uitkloptoernooi pak om die wenner van die Colan Sylvesteruitdaagbeker te bepaal. Die dag word afgesluit met ‘n wedstryd tussen Spring Roses en Bridgton. Die Spring Roses-vriendskapsbeker is hier op die spel.
Hein Coetzee, voorsitter van Spring Roses sê spanne so ver soos Kruisrivier en Matjiesrivier neem aan die uitkloptoernooi deel.
“Met die uitkloptoernooi wou ons die informele spanne wat nie by SWD-rugbyunie geregistreer is nie ‘n kans gee om hulle staal te wys. Dis hoekom ons geen geregistreerde spelers gaan toelaat om vir die spanne te speel nie. Die wenner van die toernooi kry ‘n wisseltrofee asook R1 000 kontant. Die naaswenner sal ook ‘n trofeë en R500 ontvang. Dan is daar ook wisseltrofeë op die spel vir die beste voor- en agterspeler sowel as ‘n trofee vir die beste speler van die dag.”
Hy het verder gesê die wedstryd teen Bridgton is om die vriendskapsbande tussen die twee klubs te verstewig.
“Ons hoop om jaarliks teen mekaar mee te ding om die Spring Roses-vriendskapsbeker. Ons wil ook die uitkloptoernooi ‘n jaarlikse instelling maak.”
Netbal
‘n Netbaltoernooi word ook aangebied. Die trofeë word deur raadslid Ewa Fortuin geborg. Netbalspanne kan nog Saterdag kom inskryf. Ons hoop die Oudtshoorn gemeenskap kom ondersteun ons in groot getalle by die Plate.”
Toegangsfooi beloop R10 vir volwassenes en R5 vir kinders.