Boplaas SA se portkampioen
Boplaas familie wingerde in Calitzdorp het weereens bewys dat hulle die voorste port en Portugese rooiwyn produseer.
Dié kelder is verlede week by die SA Jongwynskou as die portkampioen bekroon. Die uitslae van die Jongwynskou 2017 is Vrydagaand 25 Augustus by Goudini Spa bekendgemaak. Dit is ‘n prestasie wat Boplaas vanjaar vir die derde agtereenvolgende jaar behaal.
Sedert 2005 was Boplaas reeds agt keer die Suid-Afrikaanse portkampioen. Voor 2005 was die kelder wat in 1986 met die produksie van port begin het, ook twee keer as die SA portkampioen aangewys.
Boplaas se toekenning as die land se kampioen port volg op verskeie vorige prestasies van hulle port. Dit was nie slegs Boplaas se port wat presteer het nie. Die kelder se wyne spog ook met twee goue, ses silwer- en vier bronsmedaljes. Boplaas het ook twee toekennings as klaswenners ontvang.
Die SA Jongwynskou is die oudste wynskou in die land en is vanjaar vir die 185ste keer aangebied. Die wynskou bied wynmakers die geleentheid om die beste wyne van elke oesjaar aan te bied en te laat beoordeel.
Boplaas hou hierdie naweek hulle eerste bloeiselfees op 2 en 3 September. Besoekers kan Boplaas se wyne met verskillende disse proe, piekniek in die boorde hou, aan ‘n selfiekompetisie deelneem en in die bistro ontspan. Daar sal ook ‘n springkasteel vir die kinders wees
Vir meer inligting skakel Boplaas by 044 213 3326.