Twee taxi-ongelukke
Agttien mense is die afgelope naweek in die hospitaal opgeneem na twee afsonderlike taxiongelukke.
Die eerste ongeluk het Vrydag 25 Augustus omstreeks 15:15 plaasgevind, toe ‘n taxi met 18 insittendes in Jonesstraat, in die Oudtshoorn se industriële gebied, gerol het. Die taxi het gerol nadat dit ‘n Hyundai verbygesteek en teen die motor gebots het. Die botsing is op ‘n sekerheidskamera vasgevang. Op die beeldmateriaal kan gesien word hoe die taxi en die motor beide van Noord na Suid in Jonesstraat ry. Die motor het regs gedraai na Pleinstraat, toe die taxi dit wou verbygaan en dit skrams teen die sykant getref het. Die bestuurder, Robert Davids, het beheer oor die taxi verloor en dit het omgeslaan en teen ‘n heining en baksteenmuur tot stilstand gekom.
Ambulanse het 15 van die insittendes vir behandeling na die Oudtshoorn-hospitaal geneem.
Sers. Gretchen Michaels, woordvoerder van die Oudtshoorn-polisie het bevestig dat ‘n klag van roekeloos en nalatige bestuur geopen is.
In die tweede ongeluk, Sondagmiddag, 27 Augustus omstreeks 16:40 het ‘n taxi met 13 insittendes in die Barandas-omgewing tussen Uniondale en De Rust met ‘n koedoe gebots. Drie van die insittendes, wat die drywer, Randall Akker, insluit, is in die George-hospitaal opgeneem.
Volgens die hulpdrywer, Henry Botha, was hulle na De Rust en Oudtshoorn onderweg. “Ons het glad nie die koedoe gesien aankom nie. Dit het reguit vir die voorruit gespring.”