Onwettige jagters skuldig bevind
Drie mans van Thembalethu, George, is Vrydag in die Oudtshoorn-landdroshof op drie aanklagte ten opsigte van die onwettige jag van beskermde wild skuldig bevind nadat hulle skuld erken het.
Sias Mazukisi (33), sy neef, Sparks Retyu (34) en ‘n vriend, Fundisile Maseti (38) is skuldig bevind aan die jag van beskermde diere sonder ‘n permit en buite die jagseisoen, die jag van die diere deur gebruik te maak van honde sonder ‘n permit en die wederegtelike en onwettige besit van karkasse van beskermde wilde diere sonder ‘n permit of die nodige dokumente.
Die drie is op Sondag 30 April vanjaar tydens ‘n padblokkade van die polisie op De Rust in hegtenis geneem en dieselfde aand op waarskuwing vrygelaat.
Karkasse van vier steenbokke, ‘n kolhaas, ‘n dassie en ‘n aardwolf is in die kattebak van die voertuig gevind asook twee windhonde en ‘n Amerikaanse veghond binne die voertuig.
Een van die steenbokke het nog geleef en moes deur ‘n veearts uitgesit word weens erge wonde.
Die polisie het op die wild, die honde en die voertuig beslag gelê.
Die diere is met die honde, wat deur iemand op Beaufort-Wes opgelei is, gejag en gevang. Mazukisi, Retyu en Maseti het op 27 April vanaf Thembalethu na Beaufort-Wes gereis om die honde te gaan haal en is daar geleer hoe om met die honde te werk en met hulle te jag.
In ‘n pleitverduideliking erken Mazukisi dat hulle reeds op 27 Maart besluit het om op Beaufort-Wes met honde te gaan jag.
Volgens Retyu se bekentenis is die diere aan hulle gegee “omdat hulle van so ver ge- kom het.”
Die regsverteenwoordigers van die drie mans, Francois van Zyl (vir Mazukisi en Retyu) en Vaughn Shone (vir Maseti) het die hof vir korrektiewe toesig gevra, terwyl die staatsaanklaer, Vandana Premchand, vir opgeskorte vonnisse en boetes gevra het, maar toegee dat korrektiewe toesig ‘n opsie is.
Van Zyl het in sy voorvonnisbetoog gesê die mans en veral Mazukisi het reeds baie verloor na die polisie op sy motor en honde beslag gelê het.
“Sou die mans permitte gehad het en die regte tyd gaan jag het sou hulle niks verkeerd gedoen het nie,” het van Zyl gesê. Volgens hom is die honde goed opgelei en in ‘n baie goeie toestand.
Direkte gevangenisstraf sal volgens hom onder omstandighede onvanpas wees.
“Die beskuldigdes het oop kaarte met die hof gespeel en behoort beloning daarvoor te kry.”
Hy het ook aanbeveel dat die mans blootgestel word aan opvoedingsprogramme ten opsigte van natuurbewaring.
Volgens Shone is Maseti ook ‘n diereliefhebber en nie skuldig aan ‘n tipe misdaad vir tronk toe stuur nie. Maseti het, volgens hom, op die ingewing van die oomblik besluit om saam met sy mede-beskuldigdes te gaan. Premchand het versoek dat die honde aan ‘n dierebeskermingsvereniging oorhandig word.
Volgens haar kom die belange van die gemeenskap ook sterk na vore vir vonnisoplegging. Oor die verliese wat Masukizi gely het, het sy gesê dat dit sy eie toedoen was. Wat voorts verswarend is, is die feit dat dit ‘n georganiseerde operasie was.
Landdros Lorraine Samuels het die saak vir korrektiewe verslae en vonnisoplegging tot 17 Oktober 2017 uitgestel.