Fietsryer stabiel na ongeluk
Die fietsryer wat laat Maandagmiddag op die Lategansvlei-pad deur ‘n bakkie getref is, is steeds in die MediClinic George.
Corné Botha, hoof baanmeester: Edenbergfiets, sê Trude Stassen, ‘n veearts in Oudtshoorn, het veelvuldige beserings en verskeie beenbreuke opgedoen.
Botha was self op die toneel minute nadat die ongeluk plaasgevind het.
“Ek en Buks Gouws, wat altyd ons fietsrybyeenkomste se noodhulp behartig, het saam na die toneel gegaan. Iemand wat daar verbygery het, het ons gekontak. Buks het haar behandel tot die ambulans opgedaag het. Ek dink dit was genade dat Buks daar was. Hy het baie mooi en met baie deernis met haar gewerk om haar so gemaklik moontlik te maak. Die uitkoms van die situasie kon ook heel anders gewees het as ons nie so gou op die toneel was nie,” het hy vertel.
Volgens hom het Stassen agter die bakkie gelê en het sy geweldig baie pyn verduur.
“Ons wil nie te veel uitbrei oor haar beserings nie. Sy het ernstig seergekry, maar is tans in ‘n stabiele toestand.”
Botha sê hy maan motoriste om asseblief ook die fietsryers op paaie in ag te neem.
“Fietsryers oefen gereeld op die paaie, ook op die grondpaaie. Daarom vra ons motoriste om waaksaam te wees. Ry stadiger by die draaie en probeer om ‘n afstand van minstens 1,5 m te handhaaf wanneer fietsryers verbygesteek word.”
Volgens kapt. Louis Visser, woordvoerder van die Oudtshoorn-polisie word die oorsaak en omstandighede van die ongeluk ondersoek.
“Na bewering het beide die bakkie en fietsryer in dieselfde rigting gery en het die bestuurder van die bakkie die fietsryer links verbygesteek. Die fietsryer het glo ook links beweeg waarna die twee gebots het,” lui ‘n verklaring wat Visser gestuur het.