Herstelwerk aan Swartbergpas vorder
Alhoewel herstelwerk aan die Swartbergpas volgens die Wes-Kaapse departement van vervoer volgens skedule vorder is die negatiewe uitwerking op sake- en toerondernemings in Prins Albert ernstig.
Die pas is reeds sedert April gesluit nadat ‘n vloed sowat 2,5 km van die pas aan Prins Albert se kant verwoes het. Dit is dit veral restaurante in die dorp wat reuse-finansiële verliese lei en sommige staar sluiting in die gesig. Minstens een toerismeonderneming van Oudtshoorn wat spesialiseer in pasbesigtigingstoere ervaar dieselfde.
Die Wes-Kaapse departement van vervoer het dit egter duidelik gestel dat veiligheid eerste kom, en dat daar geen kanse gewaag kan word om die pas te gebruik terwyl die padoppervlak en stutmure nog onstabiel is nie. Die provinsiale minister van vervoer, Donald Grant, het die herstelwerk as ’n prioriteitsprojek verklaar, sodat daar inderhaas met die werk begin kon word weens die ernstige negatiewe invloed op die ekonomie van Prins Albert en Oudtshoorn. Werk is in Junie begin, met ’n geraamde tydsduur van agttien maande. Selfs plaaslike handearbeid word ingespan.
Linda Jaquet, voorsitter van die Swartbergpastaakgroep, by wie Prins Albert-ondernemings en die Oudtshoornse toeroperateur navraag gedoen het oor die vordering, het in ’n brief vandeesmaand aan Stephanus Schoeman, produksie-ingenieur van Oudtshoorn en verbonde aan die departement vervoer van die Wes-Kaapse regering, geskryf om ’n vorderingsverslag te kry. Sy wou weet of daar enige manier is dat die pas oor naweke vir verkeer oopgestel kan word, “omdat ek baie vrae van ondernemings in Prins Albert kry wat ’n ernstige finansiële terugslag weens die padsluiting beleef.
’n Toeroperateur van Oudtshoorn het ook hieroor by haar navraag gedoen. Ons besef egter veiligheid is die belangrikste oorweging en waardeer die pogings van u span,” skryf Jaquet.
Hierop het Schoeman geantwoord dat die herstelspan besig is om die pas se keermure te herbou om die padonderlae te stut.
“Ons beplan die rekonstruksie van ongeveer 180 m se keermure. Dis ’n langsame proses, omdat dit gedoen word met behulp van plaaslike handearbeid, maar ons vorder goed. Ons hoop om in September sowat 100 m van die keermure, tot op dieselfde hoogte as die padoppervlak, te voltooi en die res van die keermure, tot op die hoogte van die padoppervlak, teen die eerste week in Oktober af te handel. Dit sal ons kans gee om die padlae en hergruising te voltooi, terwyl die konstruksie van die keermure aan die kante voortgaan.”
Volgens hom is daar reeds met die hergruising van die beskadigde dele begin, en die beplande voltooiing hiervan is middel Oktober. “Tot dan kan ons nie verkeer deur die pas toelaat nie. Behalwe die grootskaalse skade, het die reën ook ’n groot verlies aan gruis oor ’n afstand van vier kilometer veroorsaak. Ons wil dié deel hergruis voordat ons die pad oopstel. Hierdie werk sal van ongeveer middel Oktober tot middel Desember duur. Ons verkies om die pad in dié tyd heeltemal te sluit, maar dit sal dalk moontlik wees om beperkte verkeer in geskeduleerde tye toe te laat. Hieroor kan onderhandel word, sodra die grootste vloedskade herstel is.”
Vir ondernemings is dit die tweede keer binne net meer as ’n jaar dat die pas – ’n groot toeristeaantrekkingskrag – gesluit word. In Maart verlede jaar is die pad, wat toe kwaai uitgetrap was, teen R4 miljoen opgeknap en twee maande lank gesluit. Toerismeorganisasies het toe gekla dat dié herstelwerk tydens hul hoogseisoen, ondeurdag was.
Byron La Hoe, vir die Wes-Kaapse departement vervoer, het by navraag gesê die Swartbergpas word om veiligheidsredes gesluit totdat alle noodsaaklike herstelwerk voltooi is. “Dit sluit in die herbouing van stutstrukture en padlae, asook hergruising. Die hergruising sal middel Oktober klaar wees, as alles volgens plan verloop. Die ander vier kilometer wat ’n ernstige gruisverlies ervaar het weens die swaar reën, sal middel Desember voltooi wees.”