Vrou wat seun doodsteek sal begrafnis bywoon
Die vrou wat haar 16-jarige seun doodgesteek het is Woensdag in die Oudtshoorn-landdroshof borgtog van R500 toegestaan en sal haar seun se begrafnis kan bywoon.
Ellen Mentoor (37) word van moord aangekla. Sy het haar seun, Clinton Mentoor, op Saterdag 9 September tydens ‘n stryery met ‘n mes in die nek gesteek. Hy is op die toneel dood.
Die saak is Dinsdag tot groot ontsteltenis van familie en vriende van die beskuldigde, uitgestel toe die ondersoekbeampte nie by die hof opgedaag het nie.
Volgens die staatsaanklaer, Leonie van Rooyen, wat nie borgtog teengestaan het nie, is Mentoor se borgtogprofiel bekom wat aantoon dat sy geen vorige veroordelings het nie.
Die beskuldigde wil volgens ‘n familielid graag haar seun se begrafnis komende Saterdag bywoon. Landdros Roelf Konstabel het borgtog op R500 vasgestel en die saak tot 27 Oktober uitgestel.
Mentoor se borgtogvoorwaardes bepaal dat sy elke Maandag en Vrydag, tussen 06:00 en 18:00, by die Bongolethu-polisiestasie aanmeld en haar weerhou van enige kontak met ‘n staatsgetuie, Bianca Jacobs.
Sy is ook gewaarsku om alle hofverskynings by te woon en nie betrokke te raak by enige misdrywe nie. Indien wel, het die landdros gewaarsku, sal haar borgtog ingetrek en sy aangehou word totdat die saak afgehandel is.
Familielede het na die verrigtinge gesê dat hulle baie verlig is omdat dit Mentoor se begeerte is om haar seun se begrafnis by te woon.
Clinton word Saterdag om 10:00 vanuit die Pinkster Protestante Kerk in Bridgton begrawe.
Die huisdiens te Lappertsrtaat, begin om 09:00.