Erfenisviering groot in Prins Albert
Inwoners van Prins Albert het Erfenisdag, 24 September, drie dae lank gehuldig, met groepaktiwiteite wat van verlede Vrydagaand tot Sondagoggend plaasgevind het.
Die hoogtepunt van die naweek was die #US4US-talentkonsert Saterdagaand in die openbare park in die woonbuurt Noordeinde wat deur byna 2 000 mense bygewoon is. Van vieruur die middag is die park volgepak deur inwoners wat wou luister na die dorp se talentvolle sangers, rymkletsers, dansers en musici.
Ingrid Wolfaardt, dryfkrag agter die #US4USprojek, het gesê die konsert was ’n hoogtepunt ná maande se sifting en oefening van jongmense. “Die konsert was nie ’n kompetisie nie. Dit was ’n geleentheid vir talentvolles wat sedert Mei hard gewerk het om te wys wat hulle kan doen.”
Die sanger en klawerbordspeler Ving Chan, wat van die deelnemers afgerig het, het gesê dertien uit 22 aanvanklike optredes is gekies, en kundiges het die deelnemers die afgelope drie maande afgerig. Die genres het ingesluit dans, rap, sang, poësie en hip-hop. “Hierdie was ’n verhoog vir die jeug van Prins Albert om hul talent te vertoon.”
Radio Gamkaland het dié konsert regstreeks uitgesaai, asook die Erfenis-kerkdiens in dieselfde park Sondagoggend, waar onder andere die skrywer en digter Poem Mooney opgetree het.
Mooney het vertel van sy grootwordjare in Prins Albert, en hoe die dorp en omgewing hom as mens gevorm het. Nog deelnemers was die digter en vertaler Daniel Hugo, die plaaslike digter Jeanette Hough, pastoor Pieter Taaibos van Vlottenburg en die kore van laer- en hoërskole.
Die optog Saterdagoggend, waaraan talle kinders en volwassenes van die dorp deelgeneem het, het in die woonbuurt Noordeinde begin en geëindig met ’n vertoning deur die rieldansgroep, Prins Albert Vastrappers.