Kommer oor padwerke
Inwoners van De Rust het hierdie week hulle kommer uitgespreek oor die moontlike gevaar wat padwerke aan die N12 en die dorp se hoofstraat inhou.
Anton Nortier, ‘n onderwyser van die dorp, is Woensdagoggend per ambulans hospitaal toe geneem nadat sy motor deur ‘n skoolbus getref is. Die botsing het omstreeks 06:40 by die aansluiting van Steytler- en Schoemanstraat plaasgevind.
As gevolg van padwerke was daar Woensdag eenrigtingverkeer deur die dorp wat met twee stop/ry-punte beheer is. Volgens Nortier het hy by die stopstraat stilgehou voordat hy uit Steytlerstraat in Schoemanstraat sou indraai.
“Die probleem met daardie aansluiting is dat mens ‘n entjie vorentoe moet ry om verby die bome te sien of daar verkeer aankom. Ek het geen verkeer van regs sien kom nie, maar nie besef daar is ‘n bus direk aan my linkerkant op pad nie, want die een kant van die pad was gesluit en hy moes dus aan die verkeerde kant van die pad ry.”
Die aankomende skoolbus, wat onderweg was om leerders op te laai het Nortier se Volvo aan die voorkant getref. Volgens omstanders by die toneel het die bus nie vinnig gery nie. Die busbestuurder was alleen in die bus en is ongedeerd.
Nortier is hospitaal toe geneem en gisteroggend ontslaan. Hy het telefonies gesê sy lyf is baie seer en gekneus en sy suikervlak was hoog na die botsing.
Beide hy en ‘n sakevrou, Anne-Rita Fewell van Ray’s Coffee Shop, het gesê dat daar slegs sekere tye van die dag mense by die systrate se aansluitings is wat verkeer beheer.
“Dit is gevaarlik as mens saans of vroeg in die oggend uit ‘n systraat in Schoemanstraat moet indraai, want jy weet nie watter kant toe jy mag ry nie omdat daar niemand is wat jou wys nie,” het Fewell, wat Nortier by die ongelukstoneel bygestaan het, gesê.
Tydens die botsing was daar nie mense by die aansluiting om verkeer te beheer nie.
Ander inwoners met wie die
Oudtshoorn Courant gesels het, het hulle kommer oor die padwerke tydens die komende vakansieseisoen uitgespreek. Die N12, wat die hoofroete tussen Beaufort-Wes en die SuidKaap is, dra normaalweg swaar verkeer, maar tydens die vakansieseisoen is daar ‘n drastiese toename in verkeer.
Fewell het ook haar kommer uitgespreek oor die spoed waarmee sommige voertuie deur die dorp ry. “Iets sal gedoen moet word om mense te dwing om stadiger deur ons dorp te ry.”