Toeriste gestrand na bestuurder se arrestasie
‘n Groep Duitse toeriste wat na Port Elizabeth onderweg was, is verlede Vrydag in Oudtshoorn gestrand gelaat nadat hulle busbestuurder op aanklag van dronkbestuur in hegtenis geneem is.
Volgens kapt. Lou is Visser, kommunikasiebeampte van die Oudtshoorn-polisie, het‘ n verkeersbeampte die bus buite die dorp afgetrek omdat dit gelyk het of die bus meganiese probleme het.
Die bestuurder is versoek om die bus na die munisipale toetsstasie te neem om nagegaan te word. By die toetsstasie het die verkeersbeampte vermoed dat die bestuurder aangeklam is en ‘n asemtoets is gedoen. Volgens die toets was die bestuurder se alkoholvlak oor die wettige perk en is hy in hegtenis geneem en vir bloedtoetse hospitaal toe geneem.
Beamptes by die toetsstasie het bevind dat die lugsakke by die bus se linker agterwiele foutief was en die bus se lisensieskyfie is verwyder.
Die Oudtshoorn Courant het Ilse Jacobs, wat deur die provinsie aangestel is om na buitelandse besoekers om te sien, van die gestrande toeriste ingelig. Sy het gereël dat die toeriste die grotte besoek terwyl die toermaatskappy alternatiewe reëlings tref.
Die busdiens het drie minibusse van ‘n plaaslike vervoeronderneming gehuur om die toeriste grotte toe te neem en daarna na Port Elizabeth te vervoer waar ‘n nuwe bus en bestuurder vir hulle sou wag.
Volgens die woordvoerder van Protours, die eienaars van die bus, is hulle besig met ‘n interne ondersoek.
In hul verklaring meld hulle dat die bus meganies in ‘n goeie toestand was en vermoed hulle dat die skade aan die lugsakke deur die bestuurder veroorsaak is. Die padwaardigheid sertifikaat van die bus is ook aan die Oudtshoorn
Courant gestuur.
Die toermaatskappy, Private Safaris, wat die toer gereël het wou nie kommentaar op die voorval lewer nie. Die toergids wat saam met die toeriste was, was ook nie geneë om met die media te praat nie.